KAPIT: Semua Ketuai Raban Bansa nyengkaum 15 Tuai Rumah ari rumah panjai di pelilih mit Pelagus nunjukka sukung ke chukup manah ngagai pengari Barisan Nasional (BN) ke ngarika sitak Pelagus maya pengawa bepilih besai nengeri tu ila.
Nguluka sukung nya, Tuai Rumah Daniel Dian ke mega Sekretari Serakup Ketuai Raban Bansa Iban Pelilih Kapit (KADICLA) sereta ketuai raban bukai ngulu pengawa Ketuai Begulai enggau Rayat ke diatur Parti Rakyat Sarawak (PRS) sitak Pelagus ke di Rumah George di Sungai Pelagus, Batang Rajang empai lama ke udah.
Pengerami nya dipenyadika Sekretari Politik Kepala Menteri Wilson Nyabong Ijang.
“Enggau sukung ke chukup tegap ke dipandangka semua pemesai nyengkaum raban tuai rumah di menua Pelagu tu, aku meda pengari Barisan Nasional (BN) nadai penanggul menang ditu.”
Kelimpah ari nya, seiku agi tuai rumah George Ayum mega besemaya deka nyaup Daniel nyukung pengari Barisan Nasional ke ngarika sitak nya ila.
“Kitai belajar ari penyilap ke kala digaga kitai sebedau tu ba pengawa bepilih (PRN) taun 2011 suba. Aku ngarap ka kitai badu agi ilap baka ke udah sereta beri sukung ke chukup ngagai pengari BN,” ku iya.
Raban Tuai Rumah bukai ke nujukka sukung sida ngagai Barisan Nasional nyengkaum Tuai Rumah Antau, Tuai Rumah John Asun, Tuai Rumah Achong, Tuai Rumah Rabar Nasat, Tuai Rumah Maling, Tuai Rumah Belikau, Tuai Rumah Anding Kulleh ari Sungai Melinau, Baleh, Tuai Rumah Gia Ak Mejang, Tuai Rumah Melibar Kuding, Tuai Rumah Sana Jepai, Tuai Rumah Jantai, Tuai Rumah Musa sereta Tuai Rumah Jackson.
Sama bisi datai ba pengerami nya, Ketuai Pemadah PRS Pelagus, Stanley Nyitar ke mega Ex-Pengari PRS sitak Pelagus, Exco PRS Raban Indu Sarawak, Tuai Nembiak PRS Pelagus, Pemesai Opis Pemansang Raban Bansa, Kapit Patrick Gong, Sengiang Usat Pemesai Opis Pengerara Api enggau Penyah Penusah Favian Masing Lintang, sekeda ari raban Opis Pelilih Kapit sereta 15 iku Tuai Rumah serata Kapit nyengkaum pelilih mit Baleh.