Dikarang Judan Bungap //
Tuai raban bansa dipinta baum enggau pengempu kebun SIBU: Bala tuai raban bansa ba menua Sg Bawang ditangkan berandau enggau orang ti ngempu kebun dandang besai ke besemak ngambika ulih nampung karan ngelawa rumah panjai sida.
Menteri Muda ba Opis Kepala Menteri (Adat Bumiputera enggau Pekara Bansa Penan) Datuk John Sikei Tayai madah, chara nya tau bendar ngelengkaska agi rumah panjai ditampung karan.
“Chara baka tu mega ulih ngelimat agih belanja dikena ngemujurka projek nya.
“Ambis nadai kira RM2 juta ungkus dikena nyambung kuasa karan ari jalai besai.
“Tang kitai mega nangi laban agi mayuh wayar karan ari grid besai empai disambung,” pia ku iya madah.
Iya mantaika jaku nya maya Program Membara Jalinan Wanita N53 Kakus ba Rumah Jarau, Sungai Bawang Tuna, kilah ensana.
Taja pan baka nya ku iya, pengawa deka nampung paip ai ngagai menua nya nadai penanggul.
“Kitai semina minta rayat ditu begempung nyukat penyauh rumah panjai sida ari batang paip ai besai.
“Enti pengawa nyukat tu tembu tumu, kitai ngarap projek nampung paip ai tu ulih tembu ujung taun tu tauka pun taun seiti agi,” ku iya madahka baru.
Berebak enggau tu mega, John Sikie ti mega ADUN Kakus minta rayat muai ulah kepapas enggau pangan diti.
Ku iya, semina enggau chara nya, pemansang infrastruktur ulih dipenyadi enggau mujur nitihka pelin.
Iya madah, rayat menua pesisir agi mengkang randaka pemansang infrastruktur baka projek karan, ai enggau jalai alun ti nentuka pemansang penatai pemisi ruang bilik.
“Enti udah bisi jalai alun, rayat muntang agi nambahka penatai pemisi,” pia ku iya madah.
Pengawa ke diatur Opis Pekara Khas Selangau sehari nya digulu kira bisi 200 iku.