KUCHING: Program penemuai peranak ari nengeri bukai ke Sarawak ulih meri penerang ngagai sida senentang gaya pendiau enggau pemansang ke ditempa nengeri tu.
Menteri Pengintu Pengelantang Pendiau, Orang Indu engau Pemansang Ruang Bilik (KKWPK) Datuk Fatimah Abdullah madah, bisi sekeda peranak ari nengeri bukai ti ngumbai pengidup kitai di Sarawak mengkang merinsa.
Berindik ari nya, iya nyukung mayuh agi program penemuai peranak nengeri Semenanjung Malaysia kitu.
“Aku deka bekungsi peneleba maya belajar di universiti urung taun 70 suba ke alai sekeda orang ngumbai kitai di Sarawak mengkang diau ba atas pun kayu.
“Ketegal nya aku nyukung program penemuai ke bansa tu ngambika sida ulih meda gaya pendiau kitai ditu,’ku iya.
Iya mansutka jaku tu ba pengerami Makai Lemai Integrasyen ke diatur Opis Penyerakup Bansa enggau Integrasyen Nasional (JPNIN) ti matak raban Rukun Tetangga (KRT) ari Sabah enggau Kelantan ba seiti hotel ditu, malam ensanus.
Kelimpah ari nya, Fatimah madah program penemuai nya ulih ngenegap penyerakup enggau integrasyen entara rayat di menua tu.
“Penyerakup enggau integrasyen enda ditempa sengapa lalu ketegal nya kitai patut ngatur program ti ngaul semua rayat ungkup timpuh pandak enggau panjai.
“Nengah penemuai ke bansa tu kitai ulih meda enggau mata diri empu gaya pendiau tetiap nengeri,’ku iya.
Dulu agi ari nya, Menteri Pemansang Komuniti enggau Pekara Bebelika Barang Sabah Datuk Jainab Ahmad Ayid ba jaku iya rambau pengerami madah, penyampau KRT di Sabah deka manggai 800 kandang endur pengujung taun tu.
Ngenang senentang penemuai sida seraban, iya madah program ulih mantu ngenegap penyerakup enggau integrasyen lalu nyadi chara pemadu manah endur ngelaku produk tetiap nengeri.
“Di Sarawak tebilang enggau kek lapis lalu pia mega enggau di Sabah, penemuai tu ulih mantu ngangkatka ekonomi peranak nengeri tu,’ ku iya.
Bela datai Kaban Kunsil Nengeri (ADUN) Sadong Jaya Aidel Lariwoo, Sapit Direktor JPNIN Sarawak Giri Nyareng, Sekretari Mendam KKWPK Rodziah Morshidi, Direktor JPNIN Sabah Delin Liet Blaun, Direktor Biro Orang Indu Noriah Ahmad enggau orang bukai.