Dikarang Jacqueline David //
KUCHING: Sebengkah gerempung Raban Lutur ke Dipilih PERKESO (Komiti Lutur) udah ditumbuhka baruh kuasa Opis Menteri Penguasa Pemayuh Tubuh Pengereja Pengawa dipilih ari raban lutur pakar ke benung gawa ba Opis Menteri Pengerai Malaysia.
Raban Lutur tu dibagi ngagai tiga kategori, iya nya lutur kes Penusah Maya Gawa enggau Pinchin Ilat, Lutur Khas ungkup kes Penyakit Servis enggau Lutur Pengapil ungkus kes ngapil.
Naka diatu, 59 buah sepital perintah udah dipadah ungkup tuju ketetiga Komiti Lutur tu.
Menteri Penguasa Pemayuh Tubuh Pengereja Pengawa Dato Sri Richard Riot anak Jaem madah, dalam taun 2013, urung 36,795 kes bisi dibantai ba aum Komiti Lutur PERKESO.
“Tu mandangka bisi nambah 17 peratus dibanding enggau taun 2012, iya nya manggai 30,421 kes.
“Naka Jun 2014, urung 15,350 kes dibantai ngagai Komiti Lutur PERKESO, lalu ungkup Lutur Pengapil 2013, urung 9,654 kes dibanding enggau 8,610 kes (2012), iya nya nambah 11 peratus,” ku Riot.
Iya madah munyi nya lebuh bejadika atur pengawa muka Kos ‘Certified Medical Impairment Assessor (CMIA) Siri 1/2014 sereta bejadika Video Perengka Guna Pengerai PERKESO di sebengkah hotel tebilang ditu, kemari.
Kena mantu Komiti Lutur PERKESO bejalaika pengawa sida iya enggau nyentuk agi, dalam taun 2003 PERKESO bisi mansutka atur ‘Guidelines on Impairment and Diasbility Assesment of Traumatic Injuries, Occupational Diseases and Invalidity’.
“Atur nya udah dipansik tiga kali, lalu lebuh bup atur Edisi 3 nya dipunka kena 18 March tu tadi, aku minta semua panel Komiti Lutur PERKESO ngena atur bepelasarka model perambu penyampau ungkus berubat orang ke kena tasah nya (dipelaba tachat) nitihka penerang perubat ke dikemendarka sereta nitihka atur standard entarabansa,” ku Riot.
Kos CMIA ti diatur kemari dibagi ngagai dua kategori, iya nya kategori penuh sereta kategori nandu ungkup lutur ke dipilih PERKESO.
Kos CMIA digaga ninting taun sereta bekerejasama enggau Palan Pengelikun sereta Pengerai Pengawa Menua (NIOSH).
Naka diatu, 30 sesi kos CMIA udah diatur mungkur urung 2,084 iku lutur, lalu nengah kos CMIA tu, raban komiti Lutur ulih ngaga pemutus ke profesional.
Kelimpah ari nya, Riot madahka perengka guna pengerai ke diberi ngagai semua (pencharum) PERKESO endang nitihka Seksyen 57 Akta PERKESO 1969 ulih mantu ngenyampatka proses pengerai Orang Berinsuran (OB) ngambika ulih ngerai baka selama sereta dapat gawa baru.
Nitihka statistik program ‘Return to Work’ (RTW), ku iya, ari 2007 ngagai Ogos 2014, ari 16,577 OB ke enggau program tu, urung 9,662 (58.3 peratus) OB mujur gerai sereta udah gawa baru.
“Kena beratika meri bekal ubat ke efisien ngagai OB, ari taun 2012, PERKESO bisi nyendiaka sistem bekal ubat ‘online’, dikena ngelengkaska pengawa meri ubat,” ku iya.
Pemayuh OB ke nerima perengka guna tu dalam taun 2013, manggai 6,357 lalu naka Jun 2014, manggai 4,678.
Belanja ti dikena meli perengka guna pengerai dalam taun 2013 manggai RM26.1 juta lalu naka Jun 2014 manggai RM40 juta, ku Riot.
Kemari, lebih 100 raban Komiti Lutur bisi ngulu seminar nya. Dulu ari nya, Ketuai Eksekutif PERKESO, Datuk K. Selvarajah madah pemayuh kes ti bisi dipadah ngagai aum Komiti Lutur ninting taun diperatika bisi nambah.
“Nya alai, patut bisi disediaka seiti sistem ngenataika servis ke manah, efisien sereta bekualiti, ngambika tau meri penguntung ngagai pengereja pengawa kelebih agi (pencharum) PERKESO ti kena tinggang penusah di jalai alun tauka kena tepan penyakit,” ku Selvarajah.