SRI AMAN: Komiti Pemansang enggau Pengelikun Genturung Pendiau (JKKK) di pelilih menua tu dipinta nyendiaka seiti profil genturung pendiau diri empu dikena ngemuntangka pengawa ejensi perintah bejalaika pengawa.
Menteri Muda Pemansang Menua Pesisir enggau Pengawa Berumah Datuk Francis Harden Hollis madah, gerah ke ngasuh JKKK nyikap profil nya ukai ungkup disimpan JKKK aja, tang mega ambi ke bisi diibun Opis Residen enggau Opis Pelilih Menua.
“Profil genturung pendiau tu ukai semina diibun Opis Residen tauka Opis Pelilih Menua aja, tang mega beguna ngagai opis ejensi perintah ke bukai nyengkaum Opis Pemansang Mensia Mayuh (KEMAS) ke mega beguna ke profil nya.
Nya alai, tetiap rumah panjai tauka Tuai Rumah enggau kaban komiti JKKK patut begempung sereta ngatur aum sida dikena nyikap lalu nembuka profil nya,” ku iya.
Harden mansutka jaku nya lebuh ke bejadi Program Membara Sukan Rakyat ke diatur Jabatan Hal Ehwal Khas (JASA) Sri Aman di Rumah Rengkang, Lepong Empeliau ditu empai lama ke udah.
Harden ke mega Kaban Kunsil Nengeri (ADUN) Simanggang ngelalau semua komiti raban bansa di menua nya awakka seruran bejalaika tanggung pengawa sida enggau manah sereta ngemansangka genturung pendiau enggau rumah panjai diri empu.
Iya madah, komiti raban bansa patut nunjukka sukung sida mantu raban pemesai nengeri bejalaika pengawa sida sereta seruran ngiga chara ke pemadu manah mantu rayat dimenua ke dipegai sida.
Nangkanka nya, raban pemesai mega patut nitihka langgur penemu enggau perambu perintah kelimpah ari ningaka peminta rayat awakka sebarang penanggul ke nuntung rayat ulih diputarka enggau manah.
“Kitai sama ngenggaika perambu pemansang ke diatur perintah enda dipejalaika tauka enda diterima rayat di nengeri tu ke ulih ngenataika pengerugi ngagai perintah enggau rayat empu.
“Laban ke nyadi pengari ke dipilih rayat, kitai patut bejalaika pengawa enggau naka pengeransing ngangkatka pemansang rayat,” ku iya.
Sama bisi datai Kaban Parlimen Sri Aman Masir Kujat, Pemesai JASA Menua Sri Aman Whelthon Lumpoi, Tuai Opis Pelilih Menua Sri Aman (MDSA) Richard Tawan Sedu, Pemesai Khas Kaban Parlimen Sri Aman, Edmund Pirang, Tuai-Tuai Opis enggau bala rayat bukai.
Kelimpah ari nya, Harden enggau Masir sama bisi nyuaka pemeri seduai ke beungkus RM5,000 ngagai JKKK Rumah Rengkang sereta RM3,000 diungkupka ngagai Komiti Indu rumah panjai nya.
Ba program nya mega bisi diatur sekeda lumba enggau main nyengkaum pekit nyumpit, empalungka besi, boling buah nyiur, nikauka telu sereta makai buah epul.