Dikarang Rengenyan Labang
KUCHING: Gerempung Ukai Dikuasa Perintah (NGO) Dayak menua tu dilalau sereta diperansang chakah agi mantu perintah nerangka reti Chukai Barang enggau Servis (GST) ngagai peranak di menua ulu entigis enggau kandang menua pesisir.
Sapit Ketuai Direktor Kastam II, Noelle Lily Morse (gambar) madah, nya ngambika peranak menua ulu entigis enggau pesisir nengeri tu nemu pemanah pangka GST ngagai pengidup sida ninting hari.
“Kami ngasaika NGO Dayak patut chakah agi nyaup bejalaika tanggungpengawa nerangka pemanah pangka GST ngagai orang di rumah panjai, ngambika sida mereti agi sentang pekara ke dikumbai GST, laban (GST) tu ukai semina bekaul enggau orang dagang aja.
“Enti kitai di rumah panjai enda diterang sereta dipadahka pemanah pangka GST tu, sida iya ulih diakal orang dagang ba barang ti enda bechukai tang dipadahka bisi chukai. Nya kebuah hak nyadi penguna patut diterangka silik ngagai sida.
“Kitai di menua ulu enggau pesisir agi jauh tinggal pasal penerang GST tu, nama GST nya nemu tang reti sereta pemanah pangka (GST) bedau datai ba sida iya,” ku iya lebuh dikerandau Utusan Borneo ba sebengkah pengerami apin lama.
Bejaku baru iya madah, kelimpah ari meransang NGO Dayak, NGO bukai mega diperansang meri penerang pasal GST sebedau dipejalaika kena 1 April 2015.
Pemujur pengawa ngerembaika penerang bekaul enggau GST enda ulih semina dilempai ba perintah kelebih agi Opis Kastam aja tang begunaka saup ari raban NGO menua tu, ku iya.
Iya mega arapka, nengah menteri enggau menteri muda perintah ulih meri bantu ari segi belanja dikena ngatur seminar ke lebih agi ngagai menua di ulu entigis enggau pesisir ti beguna ungkus ke besai.
“Nerangka pasal GST tu ukai semina tanggungpengawa perintah baka kami Opis Kastam aja, tang mega tanggungpengawa kitai semua nyengkaum orang ke megai perintah, opis enggau ejensi perintah, NGO enggau pegguna, laban pekara tu mungkur pengidup kitai.
“Gerempung bisi belanja tang nadai ungkup dikena bejalaika pengawa meri penerang pasal GST, nya alai kami ngarapka bala menteri Dayak ulih meri sukung ari segi belanja ngambika gerempung ulih bejalaika pengawa meri penerang pasal GST,” pia ku iya ke mega nyadi Sapit Presiden SDGA seraya madahka belanja sebengkah ari kebuah penerang GST enda ulih dikerembai ngagai menua di ulu entigis enggau pesisir.
Lebuh ditanya sekalika bisi chara bukai kelimpah ari meri licha enggau ngatur seminar, iya madahka perintah mega bisi naburka penerang nya nengah media rama.
Sebengkah ari chara ke dipejalaika kami dikena nerangka GST iya nya nengah radio ti bisi ditaburka dalam jaku Iban, Melayu enggau English, lalu ngarapka orang di menua ulu entigis enggau pesisir serap ninga penerang nya, ku Noelle.