KUCHING: Penyampau peranak nengeri tu ke seranta dipeda mayuh ketegal pengeransing orang ke gawa ba Opis Pengintu Pengelantang Pendiau, Orang Indu enggau Pemansang Ruang Bilik bejalaika tanggung pengawa nyidi sida ke seranta lalu dirijista nengah program e-kasih.
Menteri ba Opis nya Datuk Fatimah Abdullah madah ba serata dunya, enda ngira ikas pemansang tetiap bagi menua sigi bisi orang ke seranta.
“Sekeda kitai engka alit ati ninga berita Sarawak ngerikut penyampau orang seranta ke pemadu mayuh taja pan nengeri tu kaya enggau pengeraja asal.
“Rikod tu baka nya laban kitai ransing bejalaika pengawa nyidi orang ke seranta di serata nengeri tu ngambika sida diberi bantu lalu dipasuk nengah program e-Kasih.
“Kitai mega ngerijista sida dalam tiga kategori iya nya umang, seranta enggau setengah seranta,” ku iya madah beserimbai enggau pengawa Gempuru Meri Basa nyerumba Pengawa Ngemansutka Bup ‘Sarawak Women in Volunteerism: Caring Hearts Touching Lives’ ke diatur di Indu Opis Biro Orang Indu ba Jalai Sultan Tengah ditu, kemari.
Ku Fatimah, kategori nya dituku bepelasarka penatai pemisi ke diterima sida (tuai ruang bilik) ninting bulan.
Orang ke dalam kategori umang nerima pemisi RM600 tauka kurang, seranta nerima RM920 tauka kurang lalu setengah seranta RM1,500 tauka kurang ari nya.
“Naka 25 September tu bepelasarka penyampau tuai ruang bilik ke dirijista nengah program e-Kasih, orang ke umang di Sarawak bisi 26,260 iku, seranta 31,531 sereta setengah seranta bisi 9,608.
Fatimah mega madahka penyampau sida ke seranta di nengeri tu mengkang mimit enti dibandingka enggau penyampau tubuh peranak nengeri.
“Ari penyampau 2.5 juta peranak Sarawak, 4.33 peratus dipasuk dalam kategori umang. Enti dibandingka enggau ba taun keterubah pengudah merdeka, mayuh pemansang tauka ubah udah ditempa ba pekara tu.
“Pengangkun kitai ngemunaska penyeranta tetap nyadi pekara ke pemadu dikemerat.
“Kitai deka majakka pengawa tu lalu mantu sesapa ke begunaka bantu nengah programe-kasih,’ku iya.