KUCHING: Menua Barat betenahka menua kitai seruran betebangka kayu ti ngujungka gaya pengangat hari di dunya seruran berubah.
Berindik ari nya mega, ngujungka menua Barat enggai meli minyak sawit ari menua tu tang semina meli ari menua bukai.
Bedau lama tu tadi, ba seiti laman berita CNN mantaika penerang ari CEO Cargill Dave Maclennan ke bepengkalan di New York iya nya sebengkah kompeni besai sereta tebilang di menua Amerika (US) ngerintaika komoditi produk betanam betupi, baka minyak sawit, pengawa dagang dalam pekara kuasa, besi enggau pengangkut, ngaga renchah baka kanji enggau sirup glukos, minyak makai ti digaga ari sayur, nupi jelu sereta ngaga pemakai proses bukai enggau sekeda pengawa industri bukai madahka entara kebuah ke ngujungka gaya hari ke seruran berubah laban pengawa betebangka pun kayu ba sekeda menua, lalu kompeni tu nyangka enggai meli minyak mata sawit (CPO) ari menua tu.
Nimbal berita nya, Menteri Pemansang Tanah Tan Sri James Jemut Masing (gambar) madah Cargill sebengkah ari pemayuh kompeni ari serata dunya ke meli CPO ari Sarawak.
“Ulah Cargill ke baka nya tau ngemuntanka atur pengawa perintah menua ke nguji deka ngemunaska orang ke seranta di menua tu.
“Mayuh ari kebun sawit di menua tu ditanam ba tanah adat asal Bumiputera (NCR) alai, standard sosio-ekonomi sitak nya bisi pemerat deka dikemanahka agi.
Enti ngelama tu pemendar kitai betanamka sawit ditu, nyadika batang penanggul ketegal isu rampa menua baka tu, tau ngujungka pengawa ngemunaska pendiau seranta lubah dikemujur,” ku Masing madah nengah whatsapp ti dianjung ngagai Bilik Berita ditu, ensana.
Iya madah anang enda ingat, menua ke nyengala mayuh penanggul ngujungka ubah ba gaya mua hari endang datai ari sitak menua maju.
“Angin kamah CO2 mayuh digaga menua maju. Reti nya, pakar rampa menua dunya minta kampung menua ke benung mansang nyedut semua CO2 ti pansut ari menua maju ngambika sida majak kaya, lalu menua ke baru deka mansang agi mengkang seranta” ku iya seraya madah menua ke seranta nulung meri ‘subsidi’ ngagai menua kaya.
Masing madah Sarawak bisi penemu ke diri empu ti nitihka atur rampa menua ke betul, lalu enda ulih dikelanyaika menua maju sepeneka ati.
“Aku enggai semina diau diri aja lalu peneka ati menua maju merintah kitai. Sarawak deka terus bekebun sereta betanam ba tanah diri empu, lalu ngaga semua utai ke ditanam kitai nya produktif ke rayat kitai empu nengah chara ke betul.
Kitai enda ‘munuh bansa ke beteluka emas’,” ku iya.
Iya madah pekara bekait enggau gaya mua hari ke berubah tanggung pengawa semua orang, enda ngira sida ke bisi pengeraja tauka nadai.
“Nya alai, Menteri Besai Datuk Seri Najib Tun Razak maya bejaku di seiti atur pengawa di New York madahka semua menua patut besaup ngereja tanggung pengawa ngurangka angin kamah, lalu ngereja pengawa nya enggau bisi bekau, ukai semina ngelakka seiti-seiti menua aja, “ ku Masing.