Dikarang Judan Bungap
KANOWIT: Chukai Barang enggau Servis (GST) ti deka bepun dipejalaika bulan April 2015 patut dipeda ari sukut positif lalu ukai ngenusutka runding.
Kaban Parlimen Kanowit Datuk Aaron Ago Dagang madah, GST dipungkal laban mayuh meri pemanah kena nganti Chukai Jual enggau Servis (SST) iya ke dikena diatu ti dipeda nadai engkeman agi.
“Badu agi tusah ati ngenang GST laban barang pemakai baka berau, gula enggau barang sekat ke bukai enda disengkaum kena GST.
“Kebendar iya, GST tu dipejalaika dikena nyemelaka tikas bayar chukai kelimpah nambahka penatai menua dikena mai pemansang sereta nyungkak pengidup rayat,” pia ku iya madah.
Iya mantaika jaku nya maya bejadika Licha GST enggau FOMCA Tikas Pelilih Kanowit ti diatur ba Dewan Opis Pelilih Kanowit ditu, Hari Dua tu tadi.
Pengawa nya digulu 150 iku bala nyengkaum ketuai raban bansa, tuai rumah enggau pengari ari ejensi perintah.
Bala ke enggau licha nya diterang enggau GST ari Opis Kastam Diraja Malaysia Sibu enggau licha ari FOMCA.
Berindik ari pekara nya, Aaron ngelalau rayat ba menua nya ngambika anang mendingka jaku orang ti madahka GST ngasuh pengidup maya hari tu majak tusah bepun ari rega barang ti majak niki.
“GST endang udah lama dipelin ba renggat Parlimen.
“Badu agi ringat nyalahka perintah. GST tu dikena perintah nambahka pengelantang pengidup kita (rayat),” ku Aaron.
Berebak enggau tu mega, Aaron ngelalau rayat ngambika landik bekelimatka belanja seririh enggau tikas belanja maya hari tu.
“Utai ke beguna diatu iya nya kitai meseti nemu ‘hak’ kitai ke nyadi rayat ngambika enda muntang dikuingka orang.
“Enti ekonomi mansang, rayat mega untung. GST sebengkah chara baru dikena perintah negutka agi ekonomi menua kitai,” ku iya.
Bela bisi datai maya tu iya nya Pemesai Opis Pelilih Kanowit Katis Noel Nyabong, Pemesai Direktor Kastam Sibu John Apau, Pemesai Opis Pelilih Kanowit Wan Mohd Wan Ismail enggau bala temuai ke bukai.