KUCHING: Orang ti betanam sawit ulih lantang nyitak seput laban sida diseliahka ari dichukai dua kali nengah pengawa eksport minyak mata sawit (CPO), enti chukai barang enggau servis (GST) dipejalaika dalam bulan April taun baru ila.
Taja pan bedau bisi penetap sentang atur chukai pengudah GST dipejalaika ila, tang Menteri Pemansang Tanah Tan Sri Dr James Jemut Masing madah, orang ke nanam sawit ulih lantang nyintak seput laban ke enda ditating chukai dua kali nya.
Baka ke dipadah Perintah Besai, chukai asil ari bejual (SST) endang hak perintah nengeri bepelasarka Enakmen Chukai Nengeri Sarawak 1998, ke alai perintah tau nyukai minyak sawit mata.
Ketegal pengawa ti udah dipejalaika sebedau tu, pekara ti ngirauka ati enti sema GST udah dipejalaika taun baru ila iya nya, orang ke nanam sawit dipelaba sama deka mayar GST enggau SST.
“Orang ke nanam sawit enda kena chukai dua kali. Nama kebuah sida dichukai dua kali ? Nama kebuah sida mayar lebih ari orang bukai ? Sida enda tau mayar chukai lebih ari orang bukai,” pia ku Masing ngenukuka pekara nya.
Lebuh ke madah ngagai The Borneo Post , naka ke diatu ku Masing, nya meh pekara ti ulih dikenukuka iya ngagai orang ti betanam sawit laban randau sentang atur chukai ungkup sektor betanam sawit mengkang dikerandau.
Ku iya, hak bejalaika chukai nya bepanggai ba perintah nengeri, lalu perintah nengeri enda ulih nginsil chukai CPO laban nya sebengkah ari batang penatai pemisi nengeri tu.
“Chukai CPO nya penatai pemisi menua kitai. Kami enda nginsil nya. Nya meh kebuah randau sentang atur chukai CPO dipejalai ngambika nengeri tu seruran bulih penatai pemisi ari sawit,” pia ku Menteri Kanan nya.
Peratus chukai ti deka ditetapka ba CPO, bepanggai ba rega CPO. Orang ti nanam sawit enda kena chukai enti rega CPO mengkang ari baruh RM1000.
Chukai asil ari bejual ke 2.5 peratus nya semina dipejalaika ba orang ke betanam sawit enti sema rega CPO niki manggai entara RM1000 nyentuk ke RM1499, lalu lima peratus agi deka dipejalaika enti rega CPO ngelui ari RM1500.
Dalam taun 2012, penatai pemisi menua tu manggai ba RM400 juta ari asil bejualka CPO aja lalu dalam taun 2013, ke alai chukai nya semina RM328 juta aja. Penyampau nya kusut berindik ari rega CPO ke nurun.