KUCHING: Sarawak enggau Sabah enda dikelaung mayar Chukai Servis enggau Barang (GST) ti deka dipejalai belabuh ari bulan April taun baru tu ila.
Berita ke ditabur ba laman pengawa rama madah, Sarawak enggau Sabah deka dikelaungka ari GST maya nya, ukai berita ke amat, ku Menteri Pengawa Berumah Datuk Amar Abang Johari Openg madah ngagai ‘The Borneo Post’ ensana.
Abang Johari madah munyi nya lebuh nimbal sebengkah berita ke ditulis dalam Bahasa Malaysia ke mantaika jaku munyi tu “Tiada GST di Sabah dan Sarawak” (Nadai GST di Sabah enggau Sarawak) ti di tabur ari bnbbc.my lalu udah nya, diambi berita nya, ditabur baru ba ‘Facebook’ orang nya.
Orang ke bempu ‘Facebook’ nya nanya ngagai media ni pengamat berita nya.
Maya diengkah dalam ‘Facebook’, bisi tiga iku orang nimbal berita nya, alai seiku orang nimbal, madahka deka bepindah ngagai Sarawak, lalu seiku agi nyaut madahka munyi berita nya nyarut runding sida iya lalu ketiga, nimbal madahka berita nya besetuju enggau orang ke bempu ‘Facebook’ nya, ngasuh netapka pengamat berita nya.
Berita ke enda amat nya “Tiada GST di Sabah and Sarawak” bisi nyebut Sapit Menteri Wang Ahmad Maslan, madahka GST deka dikena nganti Chukai Servis enggau Jual (Sales and Services Tax tauka SST) di semenanjung Malaysia tang enda nyengkaum SST di Sarawak enggau Sabah.
Maslan mega bisi nyebut baruh ‘Sarawak State Sales Tax Enactment 1998 and the Sabah State Sales Tax Enactment 1998), chukai jual (sales tax) bepanggai ba pemutus perintah kededua buah menua nya.
Lebuh dipansik enggau silik agi, jaku Ahmad Maslan nya diambi ari aum media maya nerangka pasal GST ti diatur kena 6 Mei tu tadi alai Abang Johari pan sama bisi nguluka aum media nya. Taja pan, isi jaku berita nya udah digaga betul baru, tang batang berita nya enda betul lalu tau nusut runding mensia mayuh.
“Naka ke diatu, nadai pemutus digaga Perintah Besai ngelaungka Sarawak enggau Sabah ari GST tang laban Sarawak bisi hak dalam pekara chukai jual (sales tax) baka ke ditulis dalam ‘Federal Constitution’, jurai pasal pekara tu patut digaga entara menua tu enggau perintah besai bakani ku kitai ulih ngeletakka chukai jual nya,” ku Abang Johari nerang pasal pekara tu.
Iya madah, patut bisi chara Sarawak ngulihka penguntung ke patut ungkup menua tu, baka ke ditulis dalam ‘Federal Constitution’.
“Chukai jual nya enggi kitai, ambika chunto, chukai jual ba minyak sawit mata sereta nyengkaum pengawa bejudi,” ku Abang Johari.