KUCHING: Opis Menteri Dagang Dalam Negeri, Koperasi enggau Pekara Bebeli Barang (KPDNKK) deka ngeluarka ‘Lalau Pemeli’ barang pun taun baru ngambika bisi dikena penguna mantu perintah matau rega pengudah chukai barang enggau servis (GST) berengkah dipejalaika 1 April 2015.
Pekara nya dipadahka Sapit Menteri Pekara Wang Datuk Chua Tee Yong dalam aum pengarang berita kemari, ke diatur ba Dewan Masyarakat Majlis Bandaraya Kuching Selatan (MBKS).
Ku iya, rega barang diatu dijual ngena inklusif chukai jual (10 peratus) enggau chukai servis (6 peratus), dibandingka enggau GST semina 6 peratus.
Iya madahka dikena nyeliahka orang bedagang ngakal penguna pengudah GST dipejalaika, perintah nengah KPDNKK deka ngemeratka Akta Anti-Pencatutan.
“Lebuh GST dipejalaika ila dia rega sekeda barang (enggau servis) deka bisi kurang.
“Nya alai dalam bulan Januari taun baru KPDNKK deka ngeluarka lalau pemeli ti deka diayanka ba ‘website’ opis menteri nya ngambika ulih nyadika lalau semua pemeli mantu perintah matau rega, kelimpah ari ke ulih nemu bagi rega ti ditiki enggau dikurangka.
“Beduduk ari pekara tu Akta Anti-Pencatutan amat beguna ngagai menua maju ti ngemeranka GST kena nyeliah orang dagang ngelanggar atur, nya kebuah kitai amat begunaka opis menteri tu (KPDNKK) laban sida tu mih raban penerit adat,” ku iya seraya ngelalau mensia mayuh ngeripot ngagai ejensi bekaul nyema tetemuka orang dagang ngakal.
Dulu ari nya Chua bejadika seminar GST ke diatur opis menteri iya enggau Opis Kastam sereta kerejasama ari gerempung Industri Mit enggau Petengan (IKS) enggau SUPP.
Seminar GST nya ti ngena rambai jaku ‘Leading SMEs Towards GST Era’ digulu lebih 1,300 iku orang.
Bejaku baru iya madah, lalau pemeli iya nya barang ke deka dibeli lalu KPDNKK deka ngemutuska lis pun taun baru.
Kelimpah ari nya dalam aum pengarang berita ke sama Presiden SUPP Senator Datuk Dr. Sim Kui Hian mega meransang orang mayuh meri pengibuh diri meretika pasal GST baka nyereta licha tauka seminar GST ke diatur.
Iya madah, tetiap iku orang patut nemu pasal pemanah pangka GST ngambika enda mudah kena akal.
“Pasal GST tu ukai semina patut ditemu kompeni tauka IKS aja tang semua kitai patut ngembuan penemu pasal tu. Kitai enda tau enda nemu ni bagi ti kena tauka enda kena GST enggai ke mudah kena akal,” ku Sim.