Dikarang Chris Bishop//
KUCHING: Semua sekula ugama bantu perintah, misyen enggau sekula china di nengeri tu deka nerima bantu mata duit ari Perintah Besai dalam timpuh ke semak.
Menteri Muda ba Opis Kepala Menteri (Pekara Islam) Datuk Daud Abdul Rahman madah, duit bantu nya diberi ungkup pengawa ngemanah tiap sekula.
“Ba taun 2014 tu, Perintah Besai udah ngagihka mayuh belanja ungkup pengawa ngemanah sekula ugama bantu perintah, sekula misyen sereta sekula china di nengeri tu.
“Semua sekula bantu perintah tu nerima bantu mata duit ari Perintah Besai,”ku iya.
Iya mansutka jaku tu ngagai pemberita pengudah ngarika Perintah Nengeri nerima chek bantu ari Kepala Menteri Datuk Patinggi Tan Sri Adenan Satem ti ngarika Perintah Besai di Dewan Undangan Nengeri (DUN) ditu, kemari.
Ba pengawa nya, Sekolah Agama Bantuan Kerajaan Sarawak (SABK) nerima bantu RM9.05 juta lalu Sekolah Agama Rakyat Sarawak (SAR) nerima RM310,000.
Ba kaul ke sama, Daud ke mega Menteri Muda Pemansang Infrastruktur madah sekula misyen enggau sekula china deka nerima bantu ke sama ba awak ke semak tu.
“Sapit Kepala Menteri deka ngarika Perintah Nengeri nerima duit bantu nya ti disadang diatur ba minggu ti deka datai.
“Penyampau enda ulih dipadahka dulu tang chukup mayuh lalu kitai chukup untung taun tu enti dibandingka enggau penyampau ke diterima ba taun ke udah,’ku iya.
Ambika banding, ungkup sekula bantu ugama nerima urung RM1 juta ba taun ke udah tang diatu kitai nerima bantu manggai RM10 juta, tandu iya.