KUCHING: United People’s Party (UPP) bedau lama tu tadi udah dikemendarka Opis Pengerijista Gerempung (ROS) nengah Opis Menteri Dalam Menua (KDN) muka lima buah pampang parti nya di Kuching.
Pro tem Presiden UPP Dato Sri Wong Soon Koh madah, pemendar ti diterima nya mandangka UPP sebagi ari kaling Barisan Nasional (BN) ulih diterima rayat menua tu.
UPP ku iya, sebuah parti ke ulih endur mayuh pupu raban bansa masuk parti, kelebih agi baka di sitak menua pesisir sereta parti tu empu tiga raban pemesai ke ngarika peranak Bumiputera.
“UPP sebuah parti ke nerima semua pupu raban bansa di menua tu, kelebih agi kami bisi pengari raban Bumiputera ke tegap.
“Pemerat Perintah Besai enggau Perintah Nengeri, iya nya ngaga pemansang di menua pesisir. Jemah ila, mayuh aktiviti deka digaga di menua pesisir, ngambika ulih ngerapitka agi tikas pemansang entara mengeri enggau menua pesisir,” ku Wong.
Iya madah baka tu lebuh bejaku ba atur pengawa Nyuaka Surat Pemedar ari ROS muka Pampang UPP di Kuching, di sebuah restoran ditu, kemari.
Wong to mega Menteri Wang Kedua enggau Menteri Kandang Menua enggau Pemansang Komuniti madah, ukai semina komuniti di menua pesisir aja dikemeratka tang mungkur komuniti di nengeri kelebih agi komuniti China.
“Sekeda ari sitak kerusi ADUN mungkur kededua bagi, nengeri enggau menua pesisir. Baka sitak alai aku empu, di Bawang Asan, sebagi ari tiga nya komuniti China diau di mengeri, sebagi agi komuniti China ke diau di menua pesisir sereta ke penudi, komuniti Iban. Nya alai, parti tu gawa ke semua komuniti,” ku iya.
Iya madah, UPP deka ngambi mayuh agi bala nembiak sama enggau masuk parti tu, kelebih agi sida ke endang ditemu udah mantu dalam sekeda pengawa politik baka luyar,lutur, injinir, akauntan nyengkaum sida ke bedagang mit.
“UPP mungkur tiap renggat komuniti enda ngira umur, bansa sereta pengarap.
“Enti suba, sekeda ari kitai nadai bepeluang mandangka diri, tang diatu, aku ngelalau kita sama enggau UPP di palan baru tu gawa ke rayat kitai,” ku iya.
Surat pemendar ti diterima ari ROS ngemendarka UPP muka lima buah pampang parti nya di Kuching, iya nya pampang Kuching empu, Padungan, Batu Lintang, Batu Kawa, Sentosa enggau Pending.
Wong madah, di serata menua Sarawak, UPP deka muka 35 buah pampang parti nya. Naka kediatu, udah bisi 33 buah lalu dua buah agi iya nya di Serian enggau Sri Aman baru udah dipinta pemendar.
Pemayuh raban UPP naka ke diatu bisi 3,000 iku kaban.
“UPP palan baru, endur sida ke enda bepeluang mangku tauka bejalaika sebarang tanggungpengawa ngelama tu dalam komuniti menua tu. Nya alai, UPP palan baru ungkup rebak baru, nyengkaum sida ke enda bepeluang aktif dalam politik, lalu sekeda ke enda bepeluang bejalaika pengawa nyadi ketuai,” ku iya.
“Kami ngelalu semua sida ke arapka kami ke nyadi parti baru sereta agenda baru sereta pemendar kami ngetanka parti tu.
“Sida ke kala enggau SUPP kelia, ke deka masuk UPP enggau peneka ati diri tau masuk ngagai kami kitu, laban ke batang, pemayuh ex-SUPP di UPP ke diatu, deka ngempung sebagi ari pemerat UPP,” ku iya
Taja pia, ku iya pemutus deka masuk UPP bepanggai ba ex-kaban SUPP empu, enti sida iya sama deka ngemudika pejalai nya di palan baru, sama nyingkang dalam diri sebilik BN, ke penguntung komuniti menua tu.
“Taja pia, agi bisi meh orang tuai baka aku. Tang dalam tiap gerempung kelebih agi gerempung baru, kitai agi begunaka tuai pemesai lama, ke mayuh peneleba kelebih agi ba pemun mungkal parti, ngambika ulih ngiring, ngembing rebak baru ngambika sida iya besedia jemah ila,” ku iya lalu nambah pekara pemerat bekait enggau penyerakup enggau pangan diri.
Tanggung pengawa nangkan tu ila, ku iya, iya nya pemerat ngulihka undi sereta pengarap ari komuniti China ke BN.
“Baka ke ditemu kitai, dalam kandang dua, tiga pengawa bepilih besai menua (PRN) ke udah, sukung ke BN ba entara komuniti nengeri jauh udah kurang, kelebih agi ba komuniti China.
“Dalam SUPP maya nya, semina dua kerusi dimenang ulih SUPP, iya nya di Bawang Asan (sitak kerusi Kunsil Nengeri Wong empu) enggau kerusi ADUN Senadin ti dimenang ulih Menteri Muda Lumba enggau Main Datuk Lee Kim Shin.
Wong, sebedau tu kala nyadi Sekretari Besai Parti Sa’ati Rayat Sarawak (SUPP) tang udah nya ningkilka diri ari parti nya dalam bulan Mei taun tu, ketegal penyarut ke nyadi dalam SUPP.
Naka kediatu, pengawa bepilih UPP bedau dikemutarka, lalu bedau milih sapa pemesai parti nya, datai ngagai maya bepilih parti nya ila, tang kediatu agi ngena jaku ‘protem presiden’ ke presiden parti.
Sama bisi ngulu atur pengawa nya kemari, ADUN Engkilili Johnical Rayong, Menteri Muda Pengerai Mensia Mayuh ti mega nyadi ADUN Bengoh Datuk Dr Jerip Susil enggau ADUN Opar Ranum Mina sama nadai datai laban bisi pengawa bukai.