Dikarang Rengenyan Labang //
KUCHING: Opis Kampung di menua tu deka disikap perintah ngena senyata api enggau perengka pengangkut 4X4 ngambika raban penerit adat opis nya lebih berani sereta efisyen maya bejalaika tanggungpengawa munaska aktiviti enda beradat enggau makai suap.
Kepala Menteri Datuk Patinggi Tan Sri Adenan Satem madah, raban penerit adat nya deka dilatih sereta patut nitihka ‘Standard Operation Procedures’ (SOP) ke udah ditetapka.
Nitihku iya opis kampung deka diberi awak dulu ngena senyata api sebedau dikerembaika ngagai opis tauka ejensi perintah bukai dikena napi mayuh penanggul ti enda disadang nyadi.
“Kami berengkah enggau 50 senyata api ke dibekal ngagai pemesai opis kampung dulu sebedau dikerembaika ngagai Opis Tanah & Survei (JTS), Kaunsil Minyak Sawit Malaysia (MPBO), Marin sereta penginau tisi pantai.
“Kami deka mekalka senyata api ngagai pemesai opis kampung sereta nyendiaka sida perengka pengangkut 4X4. Kami deka ngelatih sida ngambika lebih terit enggau efisyen maya bejalaika tanggungpengawa sereta nitihka SOP.
“Kami deka ngetu tauka nagang pengawa nebang enggau mai kayu enda beradat, nyual barang churi baka kelapa sawit enggau ke bukai baka kapal tunda tama enda beradat, ti udah kelalu mayuh nyadi di menua tu,” ku iya dalam aum pengarang berita kemari seraya madahka pekara nya benung diperunding tauka dikerandauka.
Dulu ari nya Adenan bejadika Seminar Integriti Anggota Penguatkuasa Perkhidmatan Negeri Sarawak, ke diatur berunggu dua hari (24-25 Spetember) ba BCCK ditu.
Nambahka nya lebuh ditanya kebuah Opis Kampung disediaka senyata api, Adenan madahka nya ngambika lebih berani enggau efisyen bejalaika pengawa.
“Tu ngambika sida lebih berani bejalaika tanggungpengawa, laban kekadang maya sida benung bejalaika pengawa nadai besenyata api tang piak bukai dipelabaka bisi ngena senyata,” ku iya.
Kelimpah ari nya lebuh ditanya bekaul enggau penyalah makai suap sepemanjai iya ke udah nyadi Kepala Menteri, Adenan madahka diri bisi nerima riput bekaul enggau pekara nya.
Iya madahka diri udah ninjauka ari langit, mayuh kampung udah dikeruga ke enda tau enda diketuka.
“Kenyau aku nyadi Kepala Menteri, aku udah nerima ripot pasal ulah nabanka kayu batang belalai tauka enda beradat, pekara bekaul enggau mayar royalti. Aku udah ninjau ari langit bisi mayuh kampung udah rusak ketegal ngulihka kayu ngena chara enda beradat. Kitai deka ngetuka semua pekara nya.
“Kami minta pemesai penerit adat enggau warden kampung seruran chakah bejalaika pengawa turun padang sereta matau. Lalu aku melabaka deka meda asil tu dalam timpuh enam bulan ke deka datai.
“Nyema statistik bedau berubah, kami enda tau enda bejalaika atur pengawa ti lebih drastik tauka chakah agi,” ku iya.