KUCHING: Tem Presiden United People’s Party (UPP) begulai enggau 40 iku kaban parti nya ari serata menua Sarawak udah nemuai betemu enggau Menteri Dalam Menua Dato Seri Dr Ahmad Zahid Hamidi di Putrajaya, hari Dua tu tadi.
Tuju penemuai basa sida iya betuaika Wong laban meri terima kasih ngagai menteri nya ke udah ngemendarka UPP dirijista.
Entara raban pemesai parti nya ke sama bisi enggau betemu enggau Zahid, iya nya ADUN Bengoh Datuk Dr Jerip Susil, ADUN Opar Ranum Mina enggau ADUN Engkilili Johnical Rayong anak Ngipa, nyengkaum sekeda raban NGO enggau profesyenal ngarika komuniti menua tu.
Aum betemu enggau Zahid ke dijangka bisi dalam sejam setengah nya di opis Zahid di Putrajaya dipadah Wong, aum ke mayuh bekaul enggau pemansang parti nya dalam komponen Barisan Nasional (BN).
“Mayuh jaku lalau ke diberi Zahid, meri peransang ngagai kami di UPP sereta pengawa ke ulih digaga UPP dalam kaul komponen BN.
“Seharitu ba atur pengawa tu, kami nerima surat ari Opis Pengerijista Gerempung (ROS) sereta udah dikemendarka Menteri KDN, ngemendarka UPP muka lima buah pampang parti tu di Kuching.
“Parti baru tu ukai semina ungkup kami tang semua komuniti,” ku Wong.
Iya madah munyi nya lebuh bejaku ba atur pengawa Nyua Surat Pemendar ari ROS ngagai pampang opis UPP di Kuching, di sebuah restoran ditu, kemari.
Lima pampang opis parti UPP ti dikemendar dibuka di Kuching iya nya di Pampang Kuching empu, Padungan, Pending, Batu Kawa, Batu Lintang enggau Sentosa.
Sebedau tu, UPP sebuah parti baru, ke ngaling BN, udah nganjung surat minta ngerijista parti nya ngagai ROS bedau lama tu ke udah, lalu naka ke diatu, pemangku pengawa parti bedau dipilih laban agi nganti pengawa bepilih parti nya diatur.