Dikarang Churchill Edward //
KUCHING: Menteri Pemansang Rama Tan Sri William Mawan minta Dewan Raban Bansa di Roban ke semina muat 50 buah mija dikemesaika agi.
Rayat di pelilih menua Roban nyau majak nambah sereta pemayuh raban nembiak di menua nya mega nambah ninting taun. Mawan ke mega Kaban Parlimen (MP) Saratok sereta Kaban Kaunsil Nengeri (ADUN) Pakan madah, rayat di Saratok patut diberi sebuah dewan ke besai ngambi bisi endur sida bejalaika pengawa.
Beserimbai enggau pengerami Malam Penyerakup Bansa ke diatur Gerempung Bansa Dayak Sarawak (SDNU) pampang Roban ari Minggu tu tadi, Mawan madah, perintah udah nyendiaka geran ungkus belanja RM100,000 dikena ngaga dewan mayuh guna ungkup rayat di Roban ditu.
Kelimpah ari nya, iya mega bisi nyuaka bantu projek mit menua pesisir (MRP) beungkus RM30,000 ngagai SDNU dikena sida ngatur sereta bejalaika pengawa.
Mawan ke mega Presiden SDNU mansutka pengaga ati iya ngagai kaban komiti SDNU Roban ke diketuai Harold Unsie Liban laban udah mujur bejalaika pengerami Malam Penyerakup Bansa nya.
“Ukai muntang kita matak pemayuh mensia datai ngulu pengerami malam tu nyengkaum 90 iku tuai rumah sereta lebih 380 kaban komiti ke bukai. Tang ketegal ngemeratka penegap penyerakup enggau kaul entara kaban komiti ke bajalaika pengawa enggau mensia mayuh, ngujungka pengerami tu diatur enggau mujur,” ku iya.
Iya mega madah “Perambu Strategik 2014 ngagai 2019” deka dipejalaika dikena ngemanahka tikas pengawa kaban komiti lebuh ke bejalaika pengawa sida.
Naka ke diatu, bisi 400 iku kaban baru SDNU pampang Roban udah ngerijista diri masuk nyadi kaban kena 30 Ogos 2013 tu tadi.
Ba awak ke bukai, Unsi madah, kaban SDNU Roban deka ngatur sebengkah program dikena nyuaka insentif ngagai raban nembiak sekula ke besekula dalam pom tiga, lima enggau enam. Program nya deka diatur seharitu, Hari Empat, 25 Septembet tu lalu ngangauka seiku pengelicha ari Biogenic Aura Crest Academy Selangor, Hitler Kiew.
Kelimpah ari nya, sekeda raban pengelicha ke datai meri bantu dalam program tu baka Dr Lambat Lindong enggau Dr Evelyn Batik Bidin ke deka meri jaku peransang ngagai raban nembiak pom tiga engggau pom lima.
Program nya deka dipajalaika enggau bantu raban bukai nyengkaum Yayasan Sarawak, Gerempung Apai Indai enggau Pengajar SMK Kalaka, Opis Pelajar Saratok enggau kaban komiti SDNU.
Beserimbai enggau program nya, mayuh bengkah tanda enggau muzik asal bansa Iban deka dipandang nyengkaum Ajat Indu, Ajat Lelaki, Pencha, Kuntau enggau Denjang.
Sama bisi datai ba pengerami nya, Sekretari Politik Kepala Menteri Peter Howell Jilan, sekeda Ketuai Raban Bansa, Penghulu George Manggie sereta Chairman Pengatur Pengawa Ex-Penghulu Inggam.