Dikarang Samuel Aubrey
ANANG SENGAPA: Gambar fail tu mandangka peranak GP Semadang ti diketuaika Samson mantah ulah sebengkah kompeni ti neresa tanah sida enggau nadai beradat.
KUCHING: Sapit Menteri Pengeraja Asal enggau Rampa Menua Datuk Seri Dr James Dawos Mamit minta piak ti bekuasa bejalaika pansik bekaul enggau ulah sebengkah kompeni ke diperita bisi neresa tanah peranak menua di genturung pendiau (GP) di Semadang, Jalai Puncak Borneo bejalaika pengawa nebang kayu enggau nadai pemendar.
Iya madah, pengereja pengawa opis perintah nyengkaum ejensi ke patut baka Opis Kampung enggau Opis Penagang Pengawa Makai Suap Malaysian (MACC) patut mutarka penanggul tu.
“Aku deka meda pansik bekaul enggau pekara tu dipejalaika enggau lengkas, silik sereta menuku,” ku iya.
Dawos ke mega Kaban Parlimen Mambong mansutka jaku nya lebuh ke dipinta meri penemu bekaul enggau penanggul ke nuntung peranak di genturung pendiau Samadang kena hari Minggu tu tadi.
Ketuai Genturung Pendiau (KK) Semadang, Samson Mangang ke nyadi ketuai raban bejalaika protes nya mantah pengawa kompeni ke neresa tanah sida. Iya madah ngagai pemberita, kompeni ke neresa tanah sida nya begunaka jalai penyauh 2.5 kilometer ari Semadang ngagai Danu dikena sida masuk neresa tanah nya taja pan jalai nya empai tembu digaga enggau manah.
Sekeda raban komiti enggau peranak di Semadang minta jalai nya digaga enggau manah ulih Opis Kereja Raya (JKR). Sida udu mantah sereta enda setujuka jalai nya ditengah kompeni ke enda beradat ngerusak jalai sida.
Ripot Polis udah digaga bekaul enggau pekara nya.
Samson ngarapka penanggul ke nuntung rayat sida diputarka enggau lengkas laban berindik ari pengawa kompeni ke neresa tanah nya mayuh penusah nyadi baka sebun, sereta jalai udu bedebu ti ulih ngujungka rayat ke diau di Semadang muntang dirampit penyakit ketegal pengawa nya.
Kelimpah ari nya, injinir JKR Pelilih Kuching Awang Mohammad Fadillah Awang Redzuan madah, sida deka bejalaika atur pengawa sida mutarka penanggul nya enggau lengkas nyengkaum nangang lori enggau mesin ke dikena kompeni nya neresa tanah perayat Semadang.
“Kami deka nagang sebarang luri batang tauka mesin ke diguna kompeni nya bejalaika pengawa sida ke bisi negah jalai tu,” ku iya.
Awang Mohammad Fadillah mega madahka diri udah ngaga ripot ngagai Opis Kampung Nengeri minta sida bejalaika atur bekaul enggau penanggul nya.
“Anang sekekali kita ngemendarka sebarang luri tauka mesin ke dikena kompeni nya bejalaika pengawa sida nengah jalai tu laban jalai tu deka rusak sereta ulih ngenataika pengerugi ngagai kitai enti enda ditagang,” ku iya.
Nitihka pansik ari raban Opis Kampung Nengeri, kompeni nya bejalaika pengawa sida enggau chara nadai pemendar ari perintah tauka nadai lisin. Sekeda ari raban kompeni nya udah ditasat sereta ditanya enggau silik bekaul enggau pengawa sida ke neresa tanah orang enggau chara ke salah sereta enda beradat.