KUALA LUMPUR: Pemutus tasat bekaul enggau kes keretas tanya Ujian Pencapaian Sekolah Rendah (UPSR) ke tiris ba matapelajar Sains enggau Bahasa Inggeris dijangka deka disua ngagai Opis Luyar Menua Malaysia (PPN) minggu baru tu ila.
Kepala Opis Pemansik Pengawa Salah Kuala Lumpur, SAC Gan Kong Meng madah, naka ke diatu raban pemansik ari opis nya benung nembuka enggau silik keretas tasat nya.
“Naka ke diatu, semua 14 iku sida ke didawa salah bekaul enggau kes tu udah dilepaska nengah jamin polis sereta nadai agi kes ke baru bisi ditemu,” ku iya.
Polis udah ngambi penerang ke silik ari 30 orang bukai dikena mantu tasat nya.
Berindik ari pekara nya, keretas peresa Bahasa Inggeris 014/1 enggau 014/2 udah dikinsil pengudah keretas ke disaut raban nembiak primari enam ke napi peresa UPSR 11 September tu tadi ke diripotka tiris.
Kelimpah ari nya, keretas peresa sabjek Sains 018, 028 enggau 038 diketuka maya nya mega ari ke disaut raban nembiak.
Kaunsil Peresa Malaysia (LPM) udah netapka 30 September tu kena bejalaika peresa UPSR nya baru ungkup dua keretas peresa ke dipadahka tiris nya.
Nangkan ke nya, polis bisi nerima ripot bekaul enggau dua iti agi keretas peresa UPSR tiris iya nya keretas Bahasa Tamil enggau Matematik. — Bernama