ANANG KAKANG: Adenan (lapan kiba) enggau Jamilah (tujuh kiba) sereta diapit Lee (enam kiba) enggau Ahmad Sarji (lapan kanan), Hamad (tujuh kanan), Idris (lima kanan) enggau raban penyereta sekim nya.
MIRI: Urung 8,763 iku raban penyereta program ‘1Malaysia People’s Trust Scheme’ (Sara 1Malaysia) ari serata Sarawak udah nerima akaun Amanah Saham 1Malaysia (AS 1Malaysia).
Ari pemayuh sida ke dirikod nya, 702 iku peranak menua Miri ke mungkur ungkus RM3.51 juta.
Sepuluh iku ari sida udah dipilih Permodalan Nasional Berhad (PNB) nerima bup pelaburan AS 1Malaysia beserimbai enggau program ngemunka Amanah Saham Bumiputera 2 (ASB 2) peringkat nengeri ke diatur di ‘Eastwood Valley Golf and Country Club’ (EVGCC) kena Hari Minggu tu tadi.
Ba program nya, Kepala Menteri Datuk Patinggi Tan Sri Adenan Satem nyuaka bup saham ngagai raban penerima.
Sama bisi datai, bini Kepala Menteri Datin Patinggi Puan Sri Jamilah Anu, Chairman PNB Tun Ahmad Sarji Abdul Hamid, Presiden PNB president ke mega Tuai Eksekutif PNB Group Tan Sri Datuk Seri Hamad Kama Piah Che Othman, Direktor Eksekutif Amanah Saham Nasional Berhad Datuk Idris Kechot enggau Menteri Muda Penyambung Datuk Lee Kim Shin.
Sara 1Malaysia tu dipunka urung bulan Januari 2012 nyin suba sebengkah ari chara perintah Menteri Wang nulung rayat kena ngurangka pemerinsa rayat sereta napi pemar rega barang kemayaharitu.
Sekim tu mega ngajar sereta nunjuk ngagai raban penyereta chara nyimpan belanja kelimpah ari meri sida peluang beranakka duit.
Nitihka tagit, urung 100,000 iku raban penyereta dipinta beranakka duit ba sekim tu ke mungkur ungkus RM500 juta.
Tiap penyereta deka nerima lon duit urung RM5,000 seiku.
Naka 18 September 2014 tu tadi, pemayuh penyereta ke bisi masuk sekim tu di serata menua Malaysia urung 78,638 iku.
Kelimpah ari nya, raban penyereta deka nerima duit sekim nya ari sekeda bank menua tu sekali ka ari CIMB Bank, RHB Bank tauka Bank Simpanan Nasional (BSN).
Raban penyereta sekim nya ila deka mayar baru lon sida ngagai bank dalam timpuh 60 bulan tauka lima taun enggau bayar ke patut dibayar iya nya RM84 sebulan.
Nangkanka nya, raban penyereta sekim nya mega deka nerima insiatif ungkup RM134 seiku dalam timpuh 60 bulan nya bepanggai ba atur ke udah ditetapka. Inisiatif nya deka terus dipasukka ngagai akaun AS 1Malaysia sida.
Sekim tu tebuka ngagai semua perayat menua Malaysia ke beumur entara 18 nyentuk ngagai 58 taun.
Sekim tu mega dibuka ngagai sida ke ngembuan penatai pemisi RM500 ngagai RM3,000 ninting bulan sereta tebuka ngagai raban indu ke nadai laki tauka raban lelaki ke udah nadai bini.
Ba awak bukai, sida ke deka masuk enggau sekim tu patut beresi ari bankrap sereta enda nerima sekeda sekim tauka bantu ari perintah ke diau di baru Amanah Saham Nasional Berhad (ASNB) nyengkaum ‘Hardcore Poverty Development Programme’ (PPRT), ASB Sejahtera sereta ASW 2020-Bandar.
Barang sapa ke ngembuan ati deka nyeretai sekim tu tau masuk ngagai laman web www.sara1malaysia.com.my tauka telefon nengah lumur 03-20573065 tauka faks 03-20505140.