KETERUBAH: Dr Sim (tiga ari kiba) nguluka aum CWC ke baru. Bela dipeda Riot (dua kiba).
KUCHING: Senator Datuk Dr Sim Kui Hian ensana, ngulu aum ‘Central Working Committee’ (CWC) SUPP ti baru ke mega nyadi aum keterubah diuluka iya empu pengudah mangku pengawa nyadi presiden.
Diatur pengelama lebih 3 jam ba Indu Opis Parti nya ditu, Sim ba aum pengarang berita kemari madah, CWC udah numbuhka sekeda unit ngambika tau mantu ngenegap SUPP.
Kelimpah ari nya, iya mega madah, raban ketuai ke dulu baka ex-presiden Tan Sri Peter Chin, Datuk David Teng enggau Datuk Alfred Yap udah dichiri nyadi penyanding penemu CWC ke baru ti deka megai kuasa dalam timpuh 2014 nyentuk 2017.
“CWC ke baru ba aum tu bejuraika sekeda pelin ti tau mantu ngenegap SUPP.
“Ngemujur juluk nya, kitai udah numbuhka ‘Biro Aduan Awam’ ti betuaika Wilfred Yap ke alai semua sebana ari mensia mayuh ba mayuh bengkah pekara deka diputarka biro tu.
“Kelimpah ari nya, Biro tanah tauka pekara ke bekaul enggau tanah deka betuaika Sekretari Besai Datuk Sebastian Ting lalu Biro SME deka betuaika ketuai nembiak Tan Kai,” ku iya.
Nambahka nya, Sapit Presiden Datuk Seri Richard Riot deka ngemata pekara ke bekaul enggau raban bumiputera nengah Biro Bumiputera, tandu iya.
Biro pelajar deka diuluka Tukang pekara wang ke baru Ding Koung Hing.
Dulu agi ari nya, Sim bisi nerima surat kuasa nyadi presiden ti diserahka ex-Tukang Pekara Wang SUPP Datuk David Teng ngarika Tan Sri Peter Chin.