MIRI: nembiak sekula bansa Penan ngayanka pengaga taja pan ikak, mujur datai ba sekula ke endur sida belajar di Marudi pengudah neresa pejalai penyauh 200 batu ari rumah diri mai kaki latak sereta buok tusut enda dibasu.
Di sekula, sida disediaka kereban sekula nyengkaum palan alai diau, katil, tilam enggau pua.
Kelimpah ari nya, sida mega disediaka pemakai tiga kali sehari sereta ngembuan kelas tauka palan endur belajar ke chukup likun.
Nembiak bansa Penan mulaika diri ngagai rumah sida lebuh maya pemisi sekula.
Taja pia, lebuh maya sekula dibuka ba taun baru, raban nembiak nya dipeda tusah ka pulai baru ke sekula nyambung pelajar sida.
“Tajapan mayuh perengka sekula ke chukup lantang disediaka ngagai sida nyengkaum alai diau, pemakai enggau duit belanja, tang agi mayuh raban nembiak bansa Penan enggai pulai ke sekula. Enti ditanya kebuah sida enggai pulai ke sekula, dia sida madah, enda chukup duit belanja sereta tambang pulai mansang nurun ke sekula,” Datuk Hon Choon KimEx- Sapit Menteri Pelajar Perintah Besai lebuh ke ditanya raban pemberita The Borneo Post lama ke udah.
Iya madah, penanggul ke tampak bendar ngujungka nembiak Penan tu enggai pulai ke sekula berindik ari penanggul ngulihka perengka ke ditepan ari rumah sida ke jauh di menua ulu ngagai sekula.
“Bisi sekeda sida ke belajar ba mengeri endang nadai jalai bukai kelimpah ari bejalai kaki, nepan muto enggau nepan perau ba penyauh 200 kilometer ngagai bandar ari pendiau sida di menua ulu.
“Dipelabaka tambang sekali nurun ke pasar ari endur sida ke diau urung RM100 . ngena jalai darat tauka nepan muto, urung RM 600ungkup ke sekali pejalai
“Empai agi nyebut pasal pemar rega minyak ke ngujungka raban bansa Penan tu dipalit enggau pemar rega barang tajapan sida chukup merinsa sereta pedis ngulihka belanja,” ku iya.
Hon lebuh ngenang penemuai sereta pejalai iya ngagai menua Penan ba taun 2010 suba, iya chukup tekenyit meda chara pengidup bansa Penan lebuh datai di menua nya.
Sebengkah ari kebuah raban bansa Penan diau ba menua ulu berindik ari penemu sida ke madah enda nemu chara nguna duit sereta naka ke diatu sida enda begunaka duit laban sida ngembuan pesaka asal aki ini ke ulih dikena sida idup ninting hari.
Tajapan mayuh bengkah pemansang ke deka dibai ngagai menua sida nyengkaum ngemansangka endur sida diau, tang sida enda nerima sebarang perambu pemansang nya.
Sida patut nemu, pengawa ngasu jelu enggau pemakai babas ke bukai ukai majak senang tang makin mar laban jelu enggau pemakai babas ke bisi nyau majak kurang sereta kusi. Bisi maya ila sida deka ngasaika pengelapar lalu tau ngujungka sida ngiga chara bukai dikena idup baka ngulihka sagu mulung.
Bai penyinu meda pemerinsa raban bansa Penan, Hon enggau ati ti chukup siru ngambi sekeda raban nembiak bansa Penan nya nyadika anak iru iya nyangka icha sida tau ngubah runding enggau pikir sida nyadi mensia ke menyana sereta enda tinggal pemansang ari bansa bukai.
Iya melanja sekeda duit ungkup RM10, 000 setahun dikena melanja nembiak bansa Penan ke diiru iya nyengkaum dikena mayar tambang sida sereta duit belanja ke bukai.
Bemalinka penusah ke diasai raban bansa Penan, Hon mansutka penemu iya madah nadai seiku raban perintah ulih ngubah raban bansa nya sereta nadai seiku orang ulih mutarka pengekih sida.
“Raban mensia ke megai tanggungpengawa ari semua bengkah opis tauka gerempung mensia patut beserakup mansik sereta nyerenih penatai penanggul tu. Raban bansa Penan patut di seridi awakka ulih nerima pemansang baka bansa bukai laban dunya tu majak mupuk mansang.
“Opis Pengintu Pengelantang Raban Bansa, Opis Pelajar, Opis Pengerijista Bansa enggau Opis Pelilih Menua sereta Opis Pemansang Menua Pesisir enggau Kandang Menua entara opis ke chukup beguna sereta patut bejalaika pengawa meri bantu sereta ngubah runding raban bansa Penan.
“Raban apai indai nembiak bansa Penan nadai ngembuan pemandai sereta enda kala besekula ti ngujungka sida napi mayuh penanggul bekaul enggau pematut sida nyengulaka anak sida. Tampak agi mayuh ari sida enda nemu reti pemanah enggau penguntung ngembuan pemandai sekula.
Hon enchabar diri empu deka seruran meri bantu ngagai raban nembiak bansa Penan enggau naka ulih iya.
“Aku ngarapka jemah ila bisi seiku dua anak bansa Penan tu ulih mujur dalam pelajar sereta nampung pelajar sida ba universiti. Nengah chara nya, sida deka bulih pengawa ke menyana sereta ulih ngubah nasit bansa lebih agi ruang bilik sida.” iya.
Pengudah ke pindah sereta diau di menua Malaya kenyau ari taun 2010, Datuk Hon udah kala nemuai ngagai mayuh bengkah menua pesisir nyengkaum Long Wing, Ba’Puak, Long Sian, Long Gawat, Long Ajang enggau Long Ludin.