LIMBANG: Semua pemesai perintah enggau raban pengereja pengawa ba opis perintah patut nunjukka pengeransing lebuh ke bajalaika pengawa sereta seruran besedia mantu rayat nengah chara ngemanahka tikas pengawa ke dikereja sida.
Sekretari Perintah Nengeri Sarawak Tan Sri Datuk Amar Mohamad Morshidi Abdul Ghani madah, transformasyen deka dikemeranka di semua bagi menua sereta minta sida ke mangku pengawa perintah bejalaika pengawa enggau badas dikena ngemansangka nengeri tu.
Kelimpah ari nya, sebengkah aum bekaul enggau pekara nya deka diatur enggau semua residen di tetiap pelilih menua dikena ngiga jalai ke lebih manah lebuh ke mantu rayat.
“Transformasyen tu minta semua pemesai perintah enggau pengereja pengawa perintah bejalaika pengawa enggau manah sereta seruran ngemanahka tikas pengawa kita lebuh ke belajaika pengawa ninting hari,” ku iya.
Iya mansutka jaku nya lebuh ke ngulu pengerami makai malam Karnival Sukan Opis Kepala Menteri (JKM) sereta Opis Residen enggau Pelilih Menua (RNDO) 2014 Peringkat Nengeri Sarawak ditu ensana.
Mohamad Morshidi madah, atur transformasyen nya minta serakup enggau gerempung ari semua tikas umur dikena ngenataika penyampat ngereja pengawa ke chukup beguna ngagai rayat di nengeri tu.
“Kelimpah ari nya, bala pemesai perintah dipinta ngembuan pengelandik sereta dipinta belajar nambahka penemu awakka ulih bejalaika pengawa sida enggau lebih manah.
“Pengelandik ke dikembuan chukup beguna dikena ngemanahka jalai sida lebuh ke ngereja pengawa,” ku iya.
Nangkanka nya, pemesai enggau pengereja pengawa perintah mega patut nemu atur ke dikemerat lebuh ke mangku pengawa dalam perintah dikena ngemansangka nengeri Sarawak nuju ngagai taun 2020 ila.
Urung 12 bengkah tim ari serata nengeri Sarawak bisi ngambi bagi dalam Karnival ke diatur berengkah 18 nyentuk ngagai 20 September tu tadi.
Pemayuh empat bengkah main ke bisi dipejalaika nyengkaum main futsal, badminton, ping pong enggau bola jaring ke nguna mayuh palan baka Dewan Suarah, Dewan Polis sereta Stadium Tertutup.
Sama bisi datai dalam Karnival nya, Sekretari Penyerakup Nengeri Sarawak Datuk Md Yahaya Basimin, residen tetiap pelilih menua enggau bala bukai.