Raban bansa Dayak ke deka teulihka pemujur dilalau badu belaya sereta anang malu ngiga pemansang
KAPIT: Raban bansa Dayak dilalau nyeliahka diri ari ngembuan runding rindu belaya enti sema deka teulihka pemujur.
Jaku lalau nya dipansutka Senator Datuk Doris Sophia Brodie nengah sebengakah surat penerang ngagai media kemari.
Kelimpah ngumbai ulah rindu belaya nyadi seiti ari penyakit, Doris mega madah penemu ke bansa patut dibuai lengis ba genap runding bansa Dayak.
“Jam seruran nginsit aju, nya alai aku deka nangkan genap komuniti Dayak kelebih agi raban rebak baru ke maya hari tu penemu ke rindu belaya seiti utai ke masau jam.
“Aku mega andal sereta arap, kebuah ke ngujungka mayuh raban bansa Dayak suah kena tinggal laban ulah ke suah belaya.
“Kitai patut nunjukka pengeransing diri kelebih agi ba pekara pelajar kelimpah nyadi raban bansa ke bebendar ngulihka pengelandik, ngiga penemu sereta mayuh agi pekara bukai ke ulih mai nuju pengidup ke lebih menyana,”ku iya.
Doris madah munyi nya rambau Program Mesra Rakyat di Rumah Imak, Ng Sut, Balleh, empai lama ke udah.
Doris nemuai ngagai rumah panjai nya laban deka betemu enggau seiku nembiak indu kala diberi nama setamang enggau iya maya taun 1999.
“Tu meh kebuah aku pulai ngagai rumah panjai tu laban aku kelalu gagit deka betemu enggau Doris ti udah beumur 15 taun,” ku iya.
Berebak enggau nya, iya bisi ngelalau peranak rumah panjai nya chakah agi ngidupka diri begulai enggau raban bansa bukai ba genap sukut pemansang.
“Nadai ulih datai pemansang enti enda datai ari kitai empu. Kitai patut berindik ba kedua piak kaki diri empu lalu nyingkang jauh setipak enggau ubah ke maya hari.
“Kitai mega patut ngenyauhka diri ari ulah malu sereta belajar ngasurka mua diri kelebih agi dalam ngiga pemansang,” ku iya.
Iya mega madah, raban bansa Dayak patut neladan pemujur bansa bukai baka bansa Melayu enggau China.
Rambau penemui nya, Doris ti mega nyadi Sapit Speaker Kaunsil Menua nyuaka pemeri RM5,000 ngagai peramak Rumah Imak sereta pemeri RM300 ngagai tamang iya Doris Lengang ke beumur 15 taun.