Dikarang Judan Bungap
SIBU: Peranak Sungai Lengan, David Majang Sang balat ningkah penerang ke kala dipansutka Kaban Kunsil Nengeri (ADUN) Daro Murni Suhaili ti ngumbai iya semina ngemeratka diri empu aja maya ke mantai sebana sida ba menua Sungai Lengan, Daro ke bedau ampit ngasaika pemansang taja lama udah merdeka.
Majang maya berandau enggau pengarang berita kemari madah, iya minta sida ti bekaul datai meda kediri nama penusah ke ditapi sida ari suba nyentuk ke diatu.
“Jaku ke dibantai aku nengah surat berita tu kena 30 Ogos tu tadi ukai jaku aku aja tang sebana semua kami ke nguan menua Sungai Lengan.
“Diatu pan iya ulih meda projek jalai satu kilometer ke dianti enam buah rumah panjai mengkang tepagang empai tembu kenyau ari taun 2008 suba.
“Baka ni tau bula enti projek tu endang empai tembu?” pia ku iya madah.
Dulu agi ari nya Majang ti dikelala enggau nama Apai Chapi bela enggau ngulu aum pengarang berita enggau rayat Sungai Lengan, Tanjung Keling, Nanga Singat enggau Nanga Mawan ba sebengkah hotel tebilang ditu, kemari.
Kena 14 September tu tadi, Murni ba surat berita tu madahka Majang mantaika sebana dikena ngayanka pengeringat diri lalu ukai ngarika semua rayat di Sungai Lengan.
Murni mega madah utai ke disebut Majang nya seigi bula laban menua Sungai Lengan udah mayuh nerima pemansang.
“Kelimpah ari nya, sekeda pemansang bukai baka karan enggau perengka penyambung mega udah bisi diberi ngagai rayat dia,” pia ku iya.
Nampung jaku iya baru, ku Majang, jalai alun dua kilometer ngelawa SK Sungai Lengan ke diatu endang udah bisi tang ari pemanjai nya 900 meter disaup sebengkah kompeni.
“Iya ke diatu projek jalai ba seberai (bela ba menua nya) sekula ke patut digaga ari taun 2008 suba mengkang empai tembu.
“Suba kami semenua nyau betebangka buah laban projek jalai nya nujah kebun kami.
“Baka enggi aku, aku nebang 80 pun limau. Sepun dalam setaun ulih ngasilka 100 kilogram. Enti dikali enggau RM4 sekilo…berapa aku rugi?”
“Tang laban kami ditu randaka pemansang jalai alun, kami enda ngira diri rugi tang berasai lebu baka ke nganti buah enda nemu labuh,” pia ku iya madah enggau nyemetak.
Kelimpah ari nya, ku Majang, tujuh iti tiang karan ngelawa Rumah Guang Kaya, Tanjung Keling mega empai disambung karan taja udah dientak dia kenyau ari taun 80-an suba.
“Diatu sida serumah panjai 27 pintu udah pindah ngagai DUN Bawang Assan, semina tinggal dua pintu agi nyengkaum tuai rumah empu ke diau nguan tembawai dia,” ku iya madah.
Nambahka nya Majang mega madah, nadai sapa orang tau nagang iya mantaika sebana enda ngira baka ni chara laban endang ari aki ini iya suba endang peturun orang menua Sungai Lengan.
“Aku deka madah enggau nyemetak, penemu ke dibantai aku ukai dikena nguntung ke aku kediri aja tang ngira penusah ke ditapi kami semenua ngelama tu.
“Aku minta iya (Murni) badu nimbal nengah surat berita agi tang bai pekara tu (penusah ke nuntung rayat) ngagai kabinet.
“Kami enda nganu perintah tang minta pengari rayat kami chakah agi nurun meda kediri nama penusah ke ditapi rayat lebih agi rayat menua pesisir.
“Ukai ngengggaika Barisan Nasional (BN), enda ibuh bekimpin menang meh sida (maya bepilih) laban kami endang seigi nyukung pengari BN, amat meh rayat enda ngira menua bela diungkup pemansang magang,” pia ku iya madahka baru.
Kelimpah ari nya Majang mega minta opis tauka sida ti bekaul ulih mansik kebuah projek jalai alun ke semina satu kilometer nya empai tembu nyentuk sehari tu.