Dikarang Jacqueline David
KUCHING: Polis Diraja Malaysia (PDRM) Kontinjen Sarawak kemari nyirika Supt Mohammad Sar’ie Fauzi mangku pengawa nyadi Kepala Opis Pengelikun Mensia Mayuh sereta nyadi Ketuai Trafik Menua nukar penuduk DSP Mohd Jamali Umi.
Sama bisi bisi datai rambau ‘Majlis Serah Terima Tugas Ketua Jabatan Ketenteraman Awam/Ketua Trafik Negeri’ (KJKAKTN)’ ke diatur ba Dewan Mess Pegawai Kanan, IPK Sarawak tu iya nya Sapit Kepala Polis Menua Dato Chai Khin Chung.
Mohd Jamali sebedau tu kala nyadi Ketuai Polis (OCPD) Serian sebedau ke mangku pengawa di IPK nyadi KJKAKTN sementara berengkah 20 Jun tu tadi.
Kepala KJKAKTN ke baru, Mohammad Sar’ie, seiku orang ke ngembuan mayuh peneleba nyadi polis pengudah 35 taun ke udah gawa.
Sebedau tu, iya kala mangku pengawa nyadi Komandan Batalion PGA di Miri urung enam taun sebedau iya diberi pangku pengawa ke baru.
“Tu seiti pangku pengawa ke berat, ari pengawa aku ke udah di PGA Miri, tang taja pia, aku nerima pengawa tu enggau ati ke tebuka laban tiap pangku pengawa ke diberi deka dikereja enggau naka alah.
“Terima kasih ngagai Kepala Polis sereta Sapit Kepala Polis laban ke arap aku ulih mangku pengawa tu, lalu baka nya mega kaul aku enggau raban polis bukai, aku deka bekerejasama enggau semua kita,” ku Mohammad Sar’ie.
Dalam jaku Sapit Kepala Polis kemari, iya madah Mohammad Sar’ie orang ke mayuh peneleba dalam PGA lalu pengawa ke dichiri ngagai iya nya ukai tanggung pengawa ke baru.
“Ari peneleba iya, aku pechaya iya ulih mantu kontinjen Sarawak neritka agi pengawa nyaga pengelikun ba garis menua entarabansa (Malaysia enggau menua sepiak-sepiak enggau Sarawak)
“Pengawa iya dalam sukut tu berat sereta setipak laban dikearap ulih ngurangka pengawa salah ba raban PDRM kontinjen Sarawak,” ku Chai.