MIRI: Ex-Menteri Besai Selangor Tan Sri Muhammad Mohd Taib madah, rayat nengeri Sarawak patut berani ngubah runding enggau pikir sida enti deka bulih pemansang baka nengeri bukai.
Iya madah, rayat di nengeri Sarawak deka jauh tinggal dalam mayuh macham pemansang enti sida enda berani berubah sereta nukar perintah ke megai nengeri nya.
“Tajapan nengeri Sarawak sebengkah ari nengeri ke chukup besai sereta negembuan pengeraja asal ke mayuh, tang mayuh rayat di nengeri nya nadai ngembuan tanah bepala ti diempu sida baka peranak di menua Semenanjung Malaysia,” ku iya.
Nangkanka nya, Taib ke mega nyadi Sapit Chairman Informesyen enggau Media parti PAS madah, mayuh pupu raban bansa ari bemacham pengarap bisi datai ngintu pengerami Hari Malaysia ti ke-51 di nengeri nya begulai enggau parti PAS nunjukka sukung sida sereta nerima parti nya enggau ati ti lantang.
Kelimpah ari nya, raban bansa ke ngembuan pengarap ti enda sama ke bisi ngulu pengerami makai malam beserimbai enggau pengerami Hari Malaysia ti ke-51 begulai enggau parti PAS deka muka runding sida nerima parti nya enti sida nemu enggau lebih silik tuju ke bendar parti nya ngerapitka kaul enggau rayat di nengeri tu.
Tan Sri Muhammad Haji Mohd Taib mega temegah ati meda pemayuh pupu bansa di nengeri tu datai nunjukka sukung sida beserimbai enggai pengerami makai malam begulai enggau raban parti PAS ke diatur ba bandaraya Miri.
Iya mega tekenyit meda pemayuh mensia ke bisi datai ba pengerami nya tajapan enda ngembuan pengarap ke sama tauka tampak agi ari sida ke bisi datai nya ukai pengarap Islam. Tang sida meri sukung ke chukup manah.
“Aku ngarapka PAS seruran ransing ngerapitka kaul ke manah enggau rayat di nengeri tu dikena narit runding rayat sereta ngulihka sukung ti chukup tegap ari sida tajapan enda sama bansa, pengarap enggau tikas umur,” ku iya.
Sama bisi datai ba pengerami nya, Kaban Parlimen Pokok Sena ke mega Ketuai Pemadah Pusat PAS Dato’ Mahfuz Omar, Kaban Parlimen Rantau Panjang ke mega nyadi Ketuai Raban Muslimat PAS Muslimat, Siti Zailah Mohd Yusof, Ketuai PAS Sarawak Haji Adam Ahid, Chairman Raban Penyukung PAS (DHPP) Sarawak, Yeo Kian Leong sereta John Barah Chairman DHPP Miri enggau raban komiti ke bukai.
Dato’ Mahfuz Omar mansutka jaku iya madah perintah ke megai nengeri Sarawak patut nunjukka serakup ke manah enggau parti bukai. Ukai majak beserekang penemu serta enda lurus bejalaika pengawa sida laban berindik ari nya tau ngujungka rayat di nengeri Sarawak idup dalam pemerinsa. Pengaya enggau pengeraja asal di nengeri tu patut dibagi sama bela enggau parti bukai nyengkaum rayat di nengeri Sarawak sereta enda bechiping. Pengeraja asal ke dikembuan nengeri Sarawak enda patut ditengali raban parti BN enggau raban bukai ke diau dibaruh parti nya aja, tang patut dikunsi begulai engggau parti ke bukai.
DHPP Sarawak, Yeo Kian Leong madah rayat di nengeri Sarawak ulih nerima parti PAS enggau ati lantang sereta nunjukka sukung ti chukup manah laban parti nya enda kala bechiping lebuh bejalaika pengawa sida sereta beratka rayat.
Iya madahka isu bekaul enggau Hudud ke seruran disebut sebengkah ari chara ke chukup enda beradat dibai sekeda raban parti politik dikena ngenakutka rayat awak enda sekekali semak enggau parti PAS. Isu Hudud ukai nyadi ke penanggul entara pupu raban bansa di nengeri Sarawak laban atur adat endang bisi diungkupka ngagai pekara nya.
Chairman DHPP, John Barah mega madah, rayat di nengeri mega patut diberi mayuh agi pemansang ari perintah nyengkaum mayuh bengkah perambu pemansang bukai ke ulih nyungkak pemanah pengidup sida.
Beserimbai enggau pengarami makai malam nya, PAS ngemunka ‘Sarawak Welfare Fund’ ke nyadi sebengkah ari chara dikena mantu rayat di nengeri tu ke begunaka bantu.