Dikarang Rengenyan Labang //
Tang runding ti dipansutka iya nya ngayanka ulah ke bendar ari seiku peranak menua ti begelar ‘Yang Berhormat’
KUCHING: Taja pan udah ngasaika penemu nya enda patut dipansut sereta udah minta ampun ke penyalah diri pasal iya ke ngenggaika lagu Kebangsaan ditebah dalam panggung wayang sebedau wayang ditayangka, tang nya udah nunjukka runding tauka ulah ke bendar seiku orang ti begelar Yang Berhormat (YB).
Sekretari Politik ngagai Kepala Menteri Abdullah Saidol melabaka inisiatif pengemeran panggung wayang ti dekaka lagu Kebangsaan nya ditebah endang senipak nyerumba Hari Malaysia.
Nama penyalah kitai bediri enda lebih ari 3 minit dalam panggung wayang kelai bebasaka lagu Kebangsaan nya, ku iya.
“Aku tekenyit sereta pedis ati ninga jaku enggau ulah seiku peranak Malaysia ti begelar Yang Berhormat (YB) pasal nebah Lagu Kebangsaan di panggung wayang sebedau wayang ditayangka.
“Ba penemu aku, inisiatif panggung wayang tu diatur beserimbai enggau kitai ti ngintu pengerami ti besai reti ba kitai iya nya Hari Malaysia.
“Iya udah ngaku jaku iya endang enda patut lalu minta ampun. Tang penemu iya ti keterubah nya udah ngayanka runding tauka ulah iya ke bendar. Mayuh orang macha jaku iya nya lalu iya patut berasai malu ke diri empu,” ku iya madah ngagai Utusan Borneo, kemari.
Dalam media rama nengah Facebook iya, Chairman Parti Tindakan Demokratik (DAP) Sarawak Chong Chieng Jen ngaku sereta minta ampun pasal masang lagu Kebangsaan ba panggung wayang sebedau wayang ditayangka.
Taja pan aku ngasaika enda patut masang lagu Kebangsaan ba palan pemerindang baka panggung wayang, tang jaku ke dikena aku nya enda senipak, ku Chong.
“Enggau tu aku matak baru jaku ke ditulis lalu aku minta ampun ngagai jaku ke udah digaga aku. Ukai reti aku ngemaruhka lagu Kebangsaan kitai. Kebendar kami sebilik enggau aku empu bediri lebuh lagu nya dipasang,” ku Chong nengah Facebook iya pain lama.
Ngenang pekara nya baru Abdullah madahka, YB nya mega berani mandingka atur nya enggau pengawa ba menua kominis.
Lebih enda patut agi YB nya berani madahka pengawa belagu lagu Kebangsaan sebedau wayang ditayangka pengawa ti ngemalu sereta beli, ku iya.
“Aku enggau nyebut mayuh agi, aku pechaya tentu mayuh orang ulih ngakim (judge) ulah Chong ti chukup enda manah ke udah ditunjukka iya ke lalu ulih ngayanka sapa enggau penemu iya,” ku iya.
Abdullah madahka semua peranak menua ari tetiap bengkah jalai pengidup ti enda ngira penemu politik patut ulih meretika pemesai Hari Malaysia sereta patut temegah ati nyambut hari nya.
Kebuah pia ku iya, laban Hari Malaysia endang hari semua kitai ti enda ngira bansa enggau jalai pengarap ti numbuhka siti menua ti benama Malaysia.
“Manah tauka enda, tu meh menua asal kitai endur semua kitai beserakup ngereja pengawa sereta nentuka menua majak mansang lalu kitai ulih idup lantang senang baka ngelama 51 taun ti udah,” ku iya seraya madahka pengkhianat tauka penderhaka ngagai bansa enggau menua patut dipegedika.