KUCHING: Pakatan Rakyat (PR) tau dikesema baka serakup anak raja ke lenyau lebuh mata panas pansut, ku Presiden Parti Rayat Sarawak (PRS) Tan Sri James Masing.
“Lebuh mata panas pansut, anak raja pan enda dipeda agi, baka mimpi ke lenyau. Baka nya meh, DAP, PAS enggau PKR taja pan tinduk sekatil tang mimpi sida iya enda sebaka,” ku Masing.
Iya madah munyi nya lebuh nimbal jaku Menteri Besai (PM) Datuk Seri Najib Tun Razak ke madahka gempung Barisan Nasional (BN) jauh manah ari PR, sereta nimbal PR ke berebutka penuduk Menteri Besar Selangor.
“Aku besetuju enggau jaku PM, taja pan BN bisi 13 buah komponen parti tang agi tegap kandang 40 taun.
“Pakatan bisi 3 komponen, tang berebutka penuduk. Sida iya semina bisi pemerat kediri empu, sapa ke bulih dulu, lalu ukai atas pemerat pengundi ke ngundi sida,” ku iya, nandu baru.
Iya madah bida dalam BN, bisi atur sereta pemereti ati ke dititih sereta dibasa, bisi tuju, sereta penemu ke bela disetuju semua komponen parti BN, ke nyadi tenggau sereta lalau.
“Tang, ke batang, BN masa peneka sereta pemerat kaban parti, enda ngira pemesai parti dalam gempung BN. Prinsipal sereta tuju politik ke terang nyadi pemerat nyerakup komponen parti politik dalam timpuh ke panjai.
“Pakatan Rakyat enda bansa nya, laban sida semina beserakup nitihka ati ti begedika BN. Nya kebuah, utai ke enda dikerindu tauka ati ke begedi enda ulih digulaika kena beserakup tauka begempung,” ku iya.