SIBU: Opis Pengerara Api enggau Penyah Penusah (Bomba), Song deka nguna ungkus RM12.38 juta dipelabaka deka nembuka balai bomba baru nya taun 2015.
Direktor Opis Bomba enggau Penyah Penusah Nengeri Nor Hisham Mohammad madah, balai bomba baru nya bansa Kelas D.
“Kelimpah ari nya, balai bomba Tatau mega dipelabaka berengkah dibuka pun taun 2015,” pia ku iya madah.
Iya mantaika pekara nya maya ditanya sentang penyampau balai bomba ba serata nengeri ke deka tembu dalam taun tu.
Nor Hisham madah, proses tender ngaga dua bengkah agi balai bomba iya nya ba Niah enggau Samalaju deka digaga enda lama agi.
Maya ditanya perambu deka ngaga balai bomba di Sibu Jaya dikena napi penyampau tubuh ba pasar baru nya, iya madah, sida deka minta pemendar ari Unit Perambu Nengeri (STA).
Nor Hisham madah, naka ke diatu sida benung ba proses minta pemendar ngambi tanah.
Balai bomba ke diperambu digaga ba pasar baru Sibu Jaya iya nya bansa Kelas D.
Empai lama tu tadi, Sapit Pengelikun Pasar, Pengawa Berumah enggau Kandang Menua Datuk Halimah Mohamed Sadique madah, balai bomba baru deka digaga ba tiga bengkah Parlimen.
Halimah madah, balai bomba baru nya deka digaga ba Batu Niah (Parlimen Sibuti), Samalaju (Bintulu) enggau Tanjung Manis (Tanjung Manis).
Iya madah, balai bomba baru nya digaga ketegal jauh ari balai bomba ke besemak.