Dikarang Rengenyan Labang //
KUCHING: Pemutus TDC Parti Sa’ati Rayat Sarawak (SUPP) nyiri Senator Datuk Prof. Dr. Sim Kui Hian nyadi presiden baru parti nya patut dibasa, ku Sapit Ketuai Indu Parti Pesaka Bumiputera (PBB) Datuk Fatimah Abdullah.
Iya ti mega Kaban Kaunsil Nengeri (ADUN) Dalat madah, pengawa bepilih parti nya diatur nitihka undang-undang.
“Pengawa bepilih dalam parti nya udah dipejalai tauka diatur nitihka undang-undang, lalu asil ari pengawa nya Senator Datuk Prof. Dr. Sim dipilih nyadi presiden.
“Laban nya peneka enggau pemutus orang mayuh kitai patut nerima sereta bebasaka pemutus nya, lalu aku arap bendar sida ngaga pemutus nya nitihka asai ati sida, iya nya Sim orang ti pemadu patut,” ku iya.
Fatimah mansutka penemu nya lebuh ditanya bekaul enggau presiden SUPP baru, iya nya Dr. Sim ke megai penuduk presiden baru SUPP nganti Tan Sri Peter Chin, ba sebengkah aum pengarang berita ditu, kemari.
Pengawa bepilih nya diatur nyerumba ‘23rd Delegates Conference of SUPP’ ti diatur ba indu opis SUPP ditu, ensanus.
Kelimpah ari nya Fatimah lebuh ditanya bekaul enggau penyarut ke nyadi maya pekit main bol Mangkuk Malaysia 2014 entara Sarawak enggau Perak ba Stadium Negeri ditu apin lama ke udah, ti lebih agi dikereja raban nembiak, iya madah, awakka polis bejalaika pansik pasal kes nya.
Tang ku iya nyema bisi nembiak sekula malut diri ba pengawa nya, pekara nya deka dibai ngagai piak sekula enti pemutus pemasik udah digaga.
Iya ti mega Menteri Pengintu Pengelantang Pendiau, Orang Indu enggau Pemansang Ruang Bilik madah, pekara ti baka nya enda patut nyadi sereta nembiak patut ari mit dipatih nitihka undang sereta enda diperansang nyereta ulah ti enda manah nya.
“Enti enda salah, tu agi kes polis, kitai meri peluang ngagai polis bejalaika pengawa mansik lalu udah nya sida (polis) deka mai pekara nya ngagai piak sekula sereta piak sekula deka meri ukum ti senipak.
“Dikena nyeliahka pekara tu nyadi, kitai patut matih tauka ngajar nitihka undang-undang, sereta bebasaka orang bukai berengkah ari mit,” ku iya ti enggai meri penerang panjai bekaul enggau pekara nya.