KUCHING: Program ‘Bicara Wanita bersama YAB Ketua Menteri’ meri peluang ngagai urung 800 iku orang indu berandau sereta ngenataika pekara bekaul enggau orang indu ngagai Kepala Menteri.
Menteri Pengintu Pengelantang Pendiau, Orang Indu enggau Pemansang Ruang Bilik Datuk Fatimah madah, program nya deka diatur kena 18 September ba sebengkah hotel ditu ari pukul 9.00 pagi nyentuk 12.00 tengahari.
Program ti berambaika leka jaku ‘Sarawak Women in Volunteerism : Caring Hearts, Touching Lives’ sebengkah ari program diatur nyerumba pengerami ngintu Hari Orang Indu Renggat Nengeri Sarawak taun tu.
“Kami deka ngatur program ‘Bicara Wanita bersama YAB Ketua Menteri Sarawak’ kena 18 September tu, ti dipelabaka digulu urung 800 iku orang indu sekalika orang indu profesyenal, orang indu ke nyadi orang dagang, institut pelajar tinggi sereta ke bukai.
“Tuju program tu diatur dikena meri peluang ngagai orang indu Sarawak ngayanka pengibuh enggau mantaika penemu sida pasal pekara ti ditapi orang indu di nengeri tu.
“Tu mega peluang ngagai orang indu berandau terus enggau Kepala Menteri kitai,” ku iya.
Fatimah mansutka pekara nya dalam aum pengarang berita ‘Bicara Wanita bersama YAB Ketua Menteri’, ti diatur ba opis iya di Bangunan Baitulmakmur ditu, ngalih hari kemari.
Dulu ari nya Fatimah nyadi chairman aum bekaul enggau program nya begulai enggau ejensi sereta gerempung ti bekaul.
Program nya diatur Kaunsil Orang Indu enggau Ruang Bilik Sarawak (MWKS) begulai enggau Biro Indu.
Entara orang indu ke dikangau ngagai program tu ila iya nya sida ari gerempung ukai dikuasa perintah (NGO) Orang Indu Sarawak, MWKS, MPWK, ketuai opis perintah nengeri enggau perintah besai, orang indu profesyenal (lecturer, lutor, luyar, akauntan, injinir , kaunsilor) sereta ari IPT.
Dipelabaka bisi 12 bengkah pekara bekaul enggau orang indu deka dibantai sereta dikenataika raban orang indu maya nya ila nyengkaum isu ruang bilik, palan pematih, palan dagang, kualiti pengidup enggau ke bukai.
Sama bisi ngulu aum pengarang berita nya kemari Direktor Biro Indu Noriah Ahmad enggau ke bukai.