Dikarang Rengenyan Labang //
Jamilah: Raban nembiak patut chakah belajar sereta iarka penemu ti ngumbai jaku nya mar dipelajar
LUNDU: Nembiak di nengeri tu dilalau ngemerat sereta ngembuan pengerindu belajarka jaku English kena ngenegapka pemansang menua enggau bansa dalam abad ke-21 tu.
Berindik ari pekara nya, bini Kepala Menteri, Puan Sri Datuk Jamilah Anu minta raban nembiak ngiarka penemu enggau runding ti madahka jaku English nya tusah tauka mar dipelajar.
Iya ngarapka piak sekula, prinsipal, kepala pengajar enggau pengajar bejalaika tenanggungpengawa enggau chakah lebih agi ngemujurka ‘English Literacy Programme’, ke ulih ngangkatka kualiti belajar enggau ngajar jaku English.
“Aku ngelalau nembiak kitai ngambika enda ngembuan penemu tauka peragam ti ngumbai jaku English tusah dipelajar. Nembiak patut suah agi betanya ngagai pengajar sereta anang malu bejaku dalam jaku English taja pan bisi salah.
“Aku pechaya, chara enggau jalai ngajar sereta belajarka jaku English patut ngemeratka pengerindu sereta penau ngaul kereban pelajar enggau peneleba dalam belajar nengah pemereti rampa pengidup ti ngelingi.
“Aku arap bendar, nengah pengerandang program tu, sekula ulih nukuh chara ti engkeman ngambika nembiak sekula lanchat agi ngulihka pengelandik bejaku dalam English, ukai semina nguasa tang rindu ngena jaku nya,” ku iya.
Jamilah mansutka penemu iya lebuh bejaku seraya bejadika ‘English Literacy Directions Programme For Secondary School’ enggau ‘English Camp Programme’ ke diatur Yayasan Sarawak di Dewan SMK Lundu ditu, kemari.
Nambahka nya iya madahka ketuai raban bansa enggau apai indai sama besaup enggau piak sekula meransang enggau mantu nempa pengerindu sereta pengelandik deka belajarka jaku English.
English ku iya jaku sains, teknologi enggau penyambung tauka dikumbai jaku penemu.
Lalu enti enda nemu tauka bepengelandik dalam jaku English kitai ulih tinggal ari pekara ti beguna ke raban bansa kitai, ku iya.
“Pengudah jaku Mandarin, English tebal agi dikena orang mayuh bejaku ti lebih ari 350 million iku dibandingka enggau jaku bukai baka jaku Arab enggau Perancis,” ku iya seraya madahka China mega bebendar deka ngajar bansa sida jaku English.
Ba pengerami nya Jamilah bejadika bup bacha ‘English Literacy Directions Programme for Secondary Schools’ sereta ngagihka bup nya ngagai sekula dalam kandang menua Lundu/Sematan.
Bisi ba pengerami nya kemari, Direktor Yayasan Sarawak Datu Mohamad Abu Bakar Marzuki enggau ke bukai sereta bala nembiak.