Dikarang Rengenyan Labang
KUCHING: Gerempung Anak Bulan Mirah Malaysia (PBSM) Pampang Kuching deka ngatur pengawa meri perais enggau setipikit ngagai 351 iku pemeri darah ari Pelilih Kuching ke udah meri 45 pain darah tauka mayuh ari nya.
Chairman Komiti Mit Servis Rekrut Pemeri Darah, John Jong madah, pengerami nya deka diatur ujung minggu tu, ti dipelaba deka digulu mensia mayuh lebih agi raban nembiak.
Iya madah, nyerumba pengawa meri perais enggau setipikit nya dia pengawa meri darah mega bisi diatur
“Kena 6 September tu kami PBSM Pampang Kuching bisi ngatur pengawa meri perais enggau setipikit ngagai 351 iku pemeri darah, ti udah meri sepenyampau 45 pain darah tauka mayuh ari nya. Pengawa nya deka diatur ba Tingkat 9 Crown Towers berengkah pukul 8.30 pagi.
“Pemayuh ke dikangau ngagai pengerami tu ila urung 2,599 iku, ke datai ngelingi mengeri Kuching.
“Pengudah pengawa meri perais nya kami bisi ngatur pengawa meri darah. Nya alai kami ngelaluka semua orang ke baru deka meri darah datai maya tu ila, kelimpah ari orang ke endang udah nyadi pemeri darah,” ku iya.
John mansutka pekara nya dalam aum pengarang berita ditu kemari, ke diatur ba opis PBSM pampang Kuching, Jalai Reservior ditu, kemari.
Nitihka Surat Pekliling KPK 5 / 2005 kena 20 Julai 2005, Jadual Keistemewaan Rawatan Penderma Darah di Fasiliti Kesihatan (Hospital, Institut dan Klinik Kesihatan, Kementerian Kesihatan Malaysia, pemeri ti udah 41 ngagai 50 kali meri darah deka diberi pengelebih iya nya enda bebayar maya berubat luar enggau dalam sereta ulih diau ba wad kelas satu dalam timpuh enam taun.
Lalu lebih 50 kali (sida pemeri ‘whole blood’) enggau lebih 150 kali 9 sida pemeri aferesis) mega teulihka pengelebih iya nya enda bebayar maya nyadi pesakit luar enggau dalam, sereta ulih diau ba wad kelas satu dalam timpuh 10 taun enggau ulih diau ba kelas dua seumur idup pengudah timpuh 10 taun ba wad kelas satu.
Kelimpah ari nya lebuh ti ngenang pemayuh pemeri darah di nengeri tu, iya madah, tiap taun penyampau bisi nambah.
Nitihka statistik nya, ari penyampau 20,643 pemeri darah ba taun 2013 bisi 4,073 pemeri baru sereta ari penyampau 19,681 iku pemeri taun 2012 bisi 4,444 iku pemeri baru.
Penyampau 20,643 iku pemeri taun 2013 nya nyengkaum 16,527 iku pemeri lelaki enggau 4,116 iku pemeri indu. Lalu ari penyampau 19,681 pemeri taun 2012, nya nyengkaum 16,164 iku pemeri lelaki enggau 3,517 pemeri indu.
“Tiap taun penyampau pemeri darah bisi nambah iya nya ba taun 2012 bisi 19,681 iku pemeri dibandingka enggau dalam taun 2013 bisi 20,643 iku pemeri.
“Tu ngayanka penyedar mensia bekaul enggau pengawa meri darah tu majak manah,” ku iya.
Sama bisi dalam aum pengarang berita nya kemari, dua iku ari entara ti pemadu mayuh meri darah Roslan Ibrahim enggau Rose Lau.
Nyerumba aum pengarang berita nyai, Rose bisi meri RM5,000 ngagai PBSM Kuching Chapter dikena ngtur pengerami meri perais enggau setipikit Hari Enam tu (6 September).