Penyampau temuai ke datai seruran nambah tiap kali pengerami tu bisi diatur, ku Mawan
PAKAN: Pesta Pakan endang sebengkah program ke pemadu manah dikena ngangkatka rita sereta ngelakuka pelilih tu nyadi sebengka palan ke manah dilawa genap iku temuai ke deka datai ngagai endur tu.
Setipak enggau juluk tu, komiti pengatur begulai enggau mensia mayuh patut nyadaka langgur penemu ke memanah dikena ngerichahka agi pengerami tu nyadi sebengkah pengerami ke ke nyelai sereta seruran dilawa temuai ari menua jauh tauka semak tiap kali iya bisi diatur.
Menteri Pemansang Rama Sarawak, Tan Sri William Mawan Ikom madah, berebak enggau nya mega mensia mayuh patut nguna peluang bisi maya pengerami bansa tu endur ngulihka penatai pemisi nengah mayuh bengkah chara baka mukai palan endur bedaja.
“Kami deka meda rayat nemu genap program pengerami ke diatur bansa tu, ukai semina dikena merindang ati aja, tang mega patut dipeda ari sukut ke bebida.
“Mayuh peluang dagang bisi dibuka nyerumba pengerami bansa tu. Nyadi enggau nya, kita patut nguna peluang ke bisi tu enggau manah.
“Kena semua utai ke dikemisi ba endur tu baka peluang nyual asil babas, produk pengelandik jari enggau perengka bukai ke ulih narit ati,” ku Mawan.
Mawan ti mega nyadi Kaban Kunsil Nengeri (ADUN) Pakan madah munyi nya rambau nutup pengerami Pesta Pakan ke diatur ba Laman Pakan, malam kemari.
Nangkan ke nya, Mawan madah kenyau ke diatur ba taun-taun ke udah, Pesta Pakan bisi mandangka pemanah ari taun ke udah-udah.
“Penyampau temuai ke datai seruran nambah tiap kali pengerami tu bisi diatur lalu tu mega nunjukka pemanah pengerami tu.
“Berebak enggau nya mega, sukung ari mensia mayuh ke bisi nyereta aktiviti ke diatur mega mandangka pemanah.
“Berindik ari nya, kitai ngarapka pengawa ngatur pengerami tu deka terus ngerembai awakka meri bekau ke manah sereta seruran tejapaika juluk enggau tuju atur pengerami,” ku tandu Mawan.
Pengujung pengerami ke sekali tu bisi dipandangka enggau pekit Keling enggau Kumang Pesta Pakan 2014, iya nya lima iku pemekit lelaki bela betapat berebutka gelar Keling enggau semilan iku indu betapat berebutka gelar kumang.
Ba pekit Keling, gelar keling dipenggi Jackle Gawang, lalu lumur dua dipenggi Harry Kalang enggau ketiga Alexson Amir Aden.
Udah nya ba pekit Kumang, gelar Kumang dipenggi Sharron Valiny, lalu lumur dua enggau tiga diempu Diomera Darniati enggau Subang Jamit.
Semua bala pemenang nerima perais duit, midul enggau trofi. Perais ungkup bala pemenang pekit tu disuaka bini Tan Sri Mawan iya nya Puan Sri Julia Mawan.
Bela bisi datai Residen Sarikei, Dahim Nadot enggau Pemesai Pelilih Pakan, Alex Liau sereta urung 1,000 iku temuai.