Dikarang Rengenyan Labang
SELAMAT GENAP 90 TAUN: (Ari kiba) Lai, Entri, Jabu, Ngenang enggau kebukai melah kek genap 90 taun opis betanam betupi udah ditumbuhka.
KUCHING: Dalam timpuh tiga taun ke deka datai tu ila, menua Sarawak deka ngembuan 48 buah stesyen betanam betupi baru ti tebal agi ditumbuhka ba menua pesisir.
Sapit Kepala Menteri ti mega Menteri Betanam Betupi Moden, Datuk Patinggi Tan Sri Alfred Jabu Numpang madah, stesyen betanam betupi baru nya ila dikearap ulih mai transformasyen di menua pesisir.
Iya mega ngarapka stesyen baru nya mega ulih ngangkatka pemanah pengawa betanam betupi sereta nyungkak tikas pengidup peranak menua pesisir.
“Asil ari aum aku begulai enggau menteri muda sereta sekreteri mendam Opis Menteri Betanam Betupi Moden, kami bela sepenemu, stesyen betanam betupi di nengeri tu patut ditambahka agi penyampau ari ke bisi diatu, ke lebih agi di menua pesisir.
“Berindik ari nya kami merambu deka ngaga 48 buah stesyen betanam betupi baru ti enda tau enda tembu dalam timpuh tiga taun ke deka datai tu ila, ke lebih agi stesyen baru nya endang deka digaga di menua pesisir.
“Enti 48 buah stesyen betanam betupi baru tu tembu ila, kami deka chakah agi mai sereta bejalaika semua transformasyen pemansang di menua pesisir,” ku iya.
Jabu ke mega nyadi Menteri Pemansang Menua Pesisir bejaku munyi tu lebuh bejadika Majlis Anugerah Perkhidmatan Cemerlang (APC) Bagi Tahun Penilaian 2013 & Jasamu Dikenang, Opis Betanam Betupi Sarawak 2014, ti diatur ba sebengkah hotel ditu, malam ensanus.
Bejaku baru iya ngarapka perambu deka ngaga 48 buah stesyen nya ulih nyadi nyata sereta setipak enggau juluk ati Kepala Menteri Tan Sri Datuk Amar Adenan Satem ti deka mekuhka pengawa ngemansangka menua pesisir dalam kandang enam taun ke deka datai tu ila.
“Dalam timpuh enam taun ke deka datai perintah deka mekuhka pengawa ngemansangka menua pesisir.
“Kami amat setuju enggau penemu perintah nya laban nengah chara nya peranak menua pesisir deka teulihka penatai pemisi enggau pemansang ti sebaka enggau di mengeri.
“Nya alai kami ngarapka penumbuh stesyen baru nya ila setipak enggau juluk ati perintah ti deka mekuhka pengawa ngemansangka menua pesisir. Kami minta ngagai perintah besai ngungkupka mayuh agi belanja dikena bejalaika pemansang di menua pesisir nengah pengawa betanam betupi,” ku iya.
Kelimpah ari nya Jabu mega ngelalau pengereja pengawa opis perintah ke lebih agi dalam opis betanam betupi di nengeri tu ngambika chakah bejalaika Program Transformasyen Servis Ngagai Mensia Mayuh ti udah diperambu dikena nyapai Juluk Servis Ngagai Mensia Mayuh Nengeri, iya nya ‘A World Class Civil Service’.
Sama bisi mgulu pengerami nya malam ensanus, Menteri Muda Betanam Betupi (Gerempung Peladang) Datuk Sylvester Entri Muran, Sekretari Mendam Opis Menteri Betanam Betupi Moden, Datu Dr Ngenang Jangu, Direktor Opis Betanam Betupi, Lai Kui Fong enggau bala bukai.