Dikarang Judan Bungap
DARO: Taja udah manggai 57 taun dikumbai menua merdeka, tang agi mayuh rayat tunga menua ili baka ke nganti ‘buah enda labuh’ iya nya deka ngasaika pemansang baka ke disepi rayat ke diau di kandang mengeri.
Seiku ari peranak menua Sungai Lengan, Daro, David Majang Sang, maya ke berandau enggau pengarang berita kemari madah, timpuh 57 taun nya udah kelalu lama alai rayat mayuh lebih agi rayat ba menua ili nganti pemansang baka jalai alun, karan enggau bekal ai beresi.
“Ketegal ke udah enda tan ati nganti pemansang, bisi rumah panjai empai lama tu tadi nyau pechah laban mindah ngagai menua bukai ke dipeda jauh udah mansang.
“Chunto ke nyengala dipeda iya nya Rumah Guang ba Tanjung Keling di Lengan ditu.
“Diatu peranak rumah panjai nya nyau mindah ngagai Bawang Assan lalu semina Tuai Rumah enggau Mandal iya aja ke mengkang nguan temawai dia,” ku iya.
Majang pechaya pekara tu ukai semina nyadi ba menua sida nyengkaum ba Tanjung Keling, Nanga Mawan enggau Stubah aja tang mega maya hari tu udah mayuh rumah panjai pechah ngiga pengidup ke lantang agi ba menua bukai.
Ambika banding ku iya, 15 taun ke udah sida semenua udah berandau enggau pengari rayat sida senentang pengawa bepintaka pemansang jalai alun.
Tang iya madah, nyentuk ke diatu jalai pemanjai empat kilometer ngelawa rumah panjai semilan buah nyengkaum Rumah Guang empai dipenyadi.
“Bala anak sekula kami agi merau lebih satu kilometer penyauh ninting pagi enti deka nurun sekula ngagai SK Sungai Lengan.
“Penanggul sigi mayuh empai dikira maya hari ujan nambahka nya mega kala nyadi penusah nembiak lemas ba sungai nya.
“Ukai semina kami di Sungai Lengan ditu aja tang mayuh kami menua pegai Daro tauka menua tunga ke ili ke bukai ngining bendar deka meda menua bukai ti semampai nerima pemansang,” pia ku iya seraya madah semina 20 peratus aja penyampau pengundi Iban bagi Kunsil Nengeri Daro.
Majang ti ngari sida semenua andal bendar nyema opis ti bekaul baka Opis Menteri Pemansang Menua Pesisir enggau Kandang Menua ulih datai meda kediri penanggul ke benung ditapi sida.
Ketegal pekara tu ku iya, sida ngasai kediri ngining meda pemansang pegai DUN bukai lebih agi baka DUN Bawang Assan nyentuk ngandalka perintah ulih mulaika baru menua sida (Daro) dipegai DUN Bawang Assan.
“Kami minta sida ke bekaul baka pengari rayat ditu datai meda penusah ke ditapi rayat menua ili.
“Timpuh menua kitai merdeka udah ‘tuai’ bendar tang pengidup kami agi berasai enda tepantup ati,” ku sebana David.