Dikarang Rengenyan Labang
KABAN BARU: Abang Johari nerima pom Kelab Saberkas Masterskill, seraya dikemataka sida bukai. — Gambar Muhd Rais Sanusi
KUCHING: ‘Pertubuhan Belia Kebangsaan Bersatu Sarawak’ (Saberkas) minta ‘Suruhanjaya Komunikasi dan Multimedia Malaysia’ (SKMM) chakah bejalaika pengawa matau sereta nyarap penerang ti dibantaika nengah media rama di menua tu.
Presiden Saberkas, Datuk Amar Abang Johari Tun Openg madah, nya dikena nyeliahka ari sebarang penerang ti enda menuku tauka enda patut ke ngelaban pengidup rama di menua tu.
Iya arap bendar piak SKMM bisi chara dikena nyarap penerang tauka gambar ke dibantaika nengah media rama baka Facebook.
“Uji kitai meda nengah Facebook kekadang mayuh gambar ti enda menuku sereta penerang ti enda betul ulih sereta muntang ditabur tauka dipeda semua orang lebih agi sida ke ngembuan smartphone, tu meri pangka ti enda manah ngagai pemansang raban nembiak kitai.
“Nya alai Saberkas minta SKMM ngangkatka agi pemanah tanggungpengawa matau sereta nyarap penerang ke dikerembaika nengah media rama.
Sekretari besai (Saberkas) deka nulis surat ngagai SKMM, minta sida matau sereta nyarap penerang sebedau dipansutka nengah media rama.
“Kitai begunaka penerang enggau penemu ke betul, ngambika enda ngeruga runding lebih agi raban nembiak. Nyadi gerempung ti bisi tanggungpengawa ngagai raban nembiak, kami (Saberkas) deka ke nembiak ngemeranka pemanah ulah,” ku iya.
Abang Johari ti mega Menteri Dagang Temuai mansutka pekara nya dalam aum pengarang berita pengudah ‘Mesyuarat Tertinggi Saberkas Negeri Sarawak Ke-46’, ti diatur ba sebengkah hotel ditu, ngalih hari kemari.
Bejaku baru iya madah, nyadi menua ti nuju pemansang ukai patut sepeneka ati ngerembaika penerang.
Iya bepenemu piak SKMM patut ari pun ulih nyarap sebarang penerang ti enda menuku dikena nyeliahka ari terus ngerembai sereta ngelekai nyadi penyakit.
“Aku ngasaika piak bekaul (SKMM) patut pekara tu laban enti udah kelalu balat dia deka tusah ditagang tauka diputarka.
“Saberkas ngasaika taja pan 100 peratus nitihka peneka diri tang ukai reti kitai ulih sepeneka diri ngereja.
“Aku ngasaika ngagai kitai ti nyadi menua maju enda patut sepeneka ati diri lebih agi bekaul enggau penerang (ti enda betul),” ku iya ti dulu ari nya nyadi chairman aum nya.