SIBU: Bisi 292 pintu ari 12 buah rumah panjai angus taun tu, mungkur pengerugi semak RM21 juta.
Ketegal pekara tu Direktor Opis Bomba enggau Penyah Penusah Nengeri Nor Hisham Abdullah minta peranak rumah panjai nyikap diri ngena pengelandik madamka api maya penusah angus nyadi.
Iya nyukung penemu ke dibantai Kaban Parlimen Julau Datuk Joseph Salang Gandum ti ngasuh peranak rumah panjai dulu agi besaup madamka api ari ti beguai beambi keresa dalam bilik.
“Tu penemu ke manah kelimpah ngemeratka pengelikun diri, kitai patut besaup madamka api dulu seraya ke nganti penatai bomba,” ku iya maya dirandau kilah ensana.
Ku iya, udah maya iya diatu alai semua Komiti Pemansang enggau Pengelikun Genturung Pendiau (JKKK) belajar sereta ngembuan penemu ke chukup dikena napi penusah angus nyadi.
“JKKK ke udah belajar ngembuan tanggungpengawa ngintu pengelikun sereta betuaika bala bukai maya bisi penusah angus nyadi,” ku iya madah.
Sebedau tu Salang dipadahka minta semua peranak rumah panjai semampai ngemeratka pelin rumah sida nyengkaum ngaga dapur jauh ari bilik besai.
Nambahka nya ku iya, wayar karan dalam bilik mega patut setindit lalu enda ngena karan lebih ari tatak ke udah ditetap.
Iya madah, enti dapur jauh mimit ari bilik besai, api lantang agi dirara ari ke nyerarai enggau jampat ke bukai nyema api nyadi bepun ari dapur.
Ku Salang, JKKK rumah panjai mega patut ngemeratka pemesai guna perengka pengerara api sida kelimpah semampai meresa perengka nya ngambika ulih dikena enda ngira maya.