ENDA TAU ENDA: Ari dua kiba- Alexander, Peggy, Katis, Jadam enggau Juni ba pengawa miring seraya ikemataka Sali (kiba) enggau sida ke bukai.
KANOWIT: Pengawa nyukat perimeter tanah NCR entara Ngemah Tengah enggau Ulu ngenyenangka ati urung 500 iku pengempu tanah dia.
Ketuai raban bansa kandang menua nya, Penghulu Juni Massam madah, taja disakal sekeda peranak menua dia, pengawa nyukat perimeter tanah NCR dia endang udah lama dianti.
“Kami udah suah berandauka atur pengawa nyukat perimeter tanah NCR ditu begulai enggau Opis Tanah enggau Penyukat (JTS).
“Pengawa nyukat perimeter tanah NCR endang berat ba kami laban semina nengah atur ti baka tu, surat pala tanah nya dipenggi ke kami sereta ari nya mega nemu diri ngempu tanah ti dipeturunka ari niang aki ini kami kelia,” ku Penghulu Juni ba pengawa miring maya nasih menua di Lubuk Subung, Sungai Ngemah ditu Hari Enam tu tadi.
Ku iya, pemesai tanah NCR ke disukat nya entara Tapang Punggu nyentuk Batu Sebaya ba sitak N43 lalu ari Batu Sebaya nyentuk Nanga Belatong ba sitak N44.
Kaban Kaunsil Nengeri sitak Ngemah, Alexander Vincent dikangau nyadi temuai dipebasa ba pengawa ti diatur Juni begulai enggau Tuai Rumah Sali Kirak sereta Jadam Datuk.
Alexander lebuh ngenang pengawa nya, muji peranak menua dia ketegal sukung sida.
“Semina ba kandang Sungai Ngemah aja, sitak dipegai aku empai disukat. Menua Pedai, Jih, Bawan nganti digazet da,” ku iya.
Lebuh ngenang Jalai Nanga Ngungun-Nanga Jagau, iya udah minta Kepala Menteri enggau Sapit Menteri Besai ngenyampatka projek nya.
Iya mega madah, semua pampas pengempu tanah udah dibayar magang.
“Aku ngarapka projek nya ulih dipejalai sebedau PRN12 tu ila.
“Urung 30 buah rumah panjai ba Ngemah Tengah enggau Ulu deka ngasaika penguntung penembu projek nya ila,” tandu iya.
Bela bisi ngulu atur pengawa nya, Tuan DO Kanowit, Katis Noel Nyabong enggau kepala JTS Sibu, superintendan Peggy Ronin Edin.