Dikarang Chris Bishop
NYADIKA PENGINGAT: Adenan sereta semua ketuai dalam PBB begambar begulai nyerumba Ramah Tamah Aidilfitri 2014 PBB Sarawak kemari.
KUCHING: Setengah ari penyampau semua penuduk kunsil nengeri (DUN) ke baru patut diungkupka ngagai Parti Pesaka Bumiputera Bersatu (PBB), ku Kepala Menteri Tan Sri Datuk Amar Adenan Satem.
“Enti bisi atur nambah penyampau penuduk kunsil nengeri jemah, kitai dalam PBB deka minta setengah ari penyampau nya ungkup PBB.
“Kebuah pia, laban PBB sigi bisi ngembuan hak ngenataika pinta nya. Kitai nadai mayuh penyarut dalam parti,” ku iya rambau pengerami ‘Ramah Tamah Aidilfitri 2014 PBB Sarawak’ ba indu opis parti ditu, kemari.
Adenan ke mega Presiden PBB madah, parti diatu udah likun sereta mansang enda baka parti dalam serakup BN ke bukai ke enda nemu ngetu napi penyarut.
“Kitai dalam PBB meseti badas, anang nitihka singkang sida parti bukai lalu tanggung pengawa ke disan kitai lebih besai agi ari ke udah.
“Ketegal nya, kitai berani ngenataika pinta tu,”ku iya nandu.
Ngenang pengawa ngangkatka iya nyadi kepala menteri bedau lama tu tadi, Adenan madahka Datuk Amar Abang Johari enggau Datuk Amar Awang Tengah ke mega nyadi chalun kepala menteri maya nya udah meri sukung ke chukup manah.
Ku iya, kededua seduai nerima pemutus nya enggau lantang ati, tu meh PBB lalu pengawa nyadi kepala menteri seiti pengawa ke berat disan.
“Nengah saup ari Awang Tengah enggau Abang Johari sereta Jabu enggau orang bukai, semua pekara ke berat tau lempung,”ku iya.
Iya mega ngansak PBB sedia napi pengawa bepilih negeri ke deka datai ti diadang diadu sebedau bulan Jun 2016.
Kitai meseti nyikap diri lalu nitihka pelaba enti PBB mengkang badas, tusah deka ngalahka PBB, tandu iya.
“Baka pengawa bepilih ke udah, PBB bediri ba 35 penuduk lalu menang ba semua penuduk nya. Nama aja penuduk ke diberi ngagai kitai, PBB nadai penanggul teulihka pemujur,”ku iya.
Ba pengerami nya kemari, Adenan enggau bini iya Puan Sri Dato Jamilah Anu bela bisi nyuaka pemeri ngagai anak patu balu ari PERYATIM.
Bela datai kededua Sapit presiden Datuk Patinggi Tan Sri Alfred Jabu enggau Datuk Amar Abang Johari Tun Abang Openg, kededua Mandal Kanan presiden Datuk Amar Awang Tengah Ali Hassan enggau Dato Sri Douglas Uggah, Chairman Mendam ke mega Chairman Komiti Eksekutif PBB Sarawak Datuk Amar Asfia Awang Nassar.