Dikarang Rengenyan Labang //
KUCHING: Tukang urut enggau bidan tradisional tauka disebut bidan kampung diatu majak kurang sereta enda dikemeratka dunya moden diatu.
Kebuah pia tangggungpengawa bidan tradisional tu udah diambi tauka dipejalaika jururawat masyarakat enggau jururawat desa.
Lalu tukang urut mega enda dikeibuh tauka dikemeratka sekeda raban bansa laban sida lebih bepanggai ba ubat dibandingka enggau urut chara asal.
Nambahka nya pengerindu ari raban ke biak ke maya hari tu majak kurang, ngujungka pengawa nyadi tukang urut enggau bidan tradisonal majak punas.
Nitih penerang seiku tukang urut ke mega bidan tradisional, Lily Suip, 49, ti asal ari Kota Samarahan lebuh dirandau Utusan Borneo madah, pengawa ngurut tu ukai semina patut ditampung tang patut bisi pengerindu ba pengawa ngurut.
Iya madah, taja pan pengawa ngurut dipeda senang tang ke bendar bisi chara betul sereta begunaka ati ti enda bechiping mantu ngeraika orang.
Lily nampung, pengawa ngurut tauka nyadi bidan tradisional ari ini laki iya kenyau 35 taun ke udah madahka pengawa ngurut nya begunaka pengelandik.
“Aku udah 35 taun nampung pengawa ngurut sereta nyadi bidan tradisional tu.
“Pengawa ngurut tu begunaka ati ti lurus deka ngerai sereta mantu orang ke sakit. Tiap upah ke diterima mega enda tau enda disambut enggau ati ti lurus laban ke pemadu beguna kitai enda bechiping mantu.
“Diatu nyau moden, orang rebak baru tauka sida ke biak nadai pengerindu deka nampung pengawa nyadi tukang urut enggau bidan tradisional tu, ambika chunto, anak aku empu enggai nampung pengawa aku tu laban nadai pengelandik tauka pengerindu,” ku Lily.
Lily ke udah diau mendam di Kampung Segedup, Batu Kawa bisi enam iku anak madahka iya tebal agi ngurut orang indu ti bedau sereta udah beranak.
Lebuh ditanya senetang upah iya madah, nya bepanggai ba pemeri seseiku lalu iya enda minta sereta nadai ngeletak penyampau.
“Aku nadai minta, nerima aja pemeri orang, orang meri sesen dua pan diterima, paku seiti nyadi upah pan diterima laban nya asal iya, pemadu beguna aku ngurut enggau ati ti lurus laban deka mantu orang bukai,” ku iya seraya madahka upah nya bisi mantu nambahka penatai pemisi iya.
Tandu Lily, iya ukai semina ngurut orang ari genturung pendiau ke besemak tauka mengeri Kuching tang nyengkaum sida ari serata nengari tu ke datai beurut ngagai iya.
Iya mega suah dikangau orang datai ke rumah kelimpah ari orang nya empu datai ke rumah iya minta urut.
“Orang ke datai beurut ngagai aku kitu mayuh macham bansa, bisi nya bansa China, Melayu, Iban tau disebut pupu bansa, nyengkaum indu misi pan bisi.
“Aku kala diasuh orang ke menua Brunei tang aku enggai. Ditu aku ngurut orang enda ngira siang malam sekalika di rumah aku empu tauka dikangau ke rumah sida ti pinta urut,” ku iya seraya madahka diri bisi nyendiaka pakej herba beranak.
Kelimpah ari nya Lily madah, iya kala kena pilih enggau kursus bidan tradisional ke diatur di Kuching ditu.
Maya kursus nya kami mayuh diajar chara ngurut ti betul lebih agi chara jari ngurut, ku iya.