KUCHING: Perintah nengah Opis Menteri Pemansang Infrastruktur benung mansik chara ti engkeman bekaul enggau perengka pengangkut mensia mayuh ti efisien ngambi nyaup mtuarka penanggul jalai alun sekut.
Menteri Muda opis nya, Datuk Daud Abdul Rahman (gambar) madah, ngena perengka pengangkut mensia mayuh ti efisen patut dipejalai kena nentuka komuniti kitai ulih ngurangka diri bekenaka perengka pengangkut diri.
Iya ngarapka komuniti kitai mereti sereta nyukung pekara tu laban perintah enda ulih ngaga jalai alun belama.
“Perintah deka berundingka chara ngatur perengka pengangkut mensia mayuh ti efisen ba kitai ditu kena meransang orang mayuh bekenaka perengka pengangkut nya.
“Tang ti patut dipejalaika kitai diatu iya nya meri penyedar ngagai raban bansa ngambika ngena perengka pengangkut mensia mayuh, lalu tu deka dipejalaika bererenggat ngambika lebih efisen sereta kondusif awakka orang mayuh deka ngena iya.
“Nyema orang mayuh enggai ngena iya, nya ketegal enda efisen. Nyema perengka pengangkut nya efisen, aku arap bendar rayat deka ngena nyemaka bisi jalai ti senipak ngagai endur gawa. Tu meh ke dipansik kami,” ku iya.
Iya mansutka pekara nya lebuh bejaku ba ‘Majlis Ramah Tamah Aidilfitri’ Dewan Bandaraya Kuching Utara (DBKU) di Depo DBKU ditu, malam ensanus.
Ngenang pekara nya baru, Daud ti mega Menteri Muda ba Opis Kepala Menteri (Pekara Islam) madah, penyekut jalai alun enda ulih diputarka taja pan projek ngemesaika jalai, jalai alternatif enggau ke bukai dipejalaika tang enti mensia enggai ngena perengka pengangkut ti disediaka nya, penanggul jalai sekut enda ulih putar.
“Uji kitai meda di Singapore enggau mengeri besai bukai baka Kuala Lumpur, taja pan perengka pengangkut mayuh tang nadai penanggul sekut jalai alun laban sistem ngatur ti manah sereta perengka guna dalam perengka pengangkut mensia mayuh lebih efisen.
“Tu meh nyadika chunto lalu ke penudi iya raban bansa mega patut ulih meretika tanggungpengawa sida sereta ngena perengka pengangkut mensia mayuh ti disediaka,” ku iya.
Nambahka nya iya madah, ‘bypass’ di jalan Depo ti digaga dikena mutarka penyekut jalai alun di Matang mega enda ulih ngurangka penanggul nya di kandang endur nya.
“Kebuah pia laban pemansang majak nyadi di Matang nyengkaum pengawa berumah, kedai majak nambah.
“Nya alai perintah deka nentuka program ngemesaika jalai deka dipejalaika bererenggat lebih agi tiga projek iya nya ngaga ‘underpass’ di bulatan Datuk abang Kipali Abang Akip ti beungkus RM50 juta ti dipelabaka tembu taun baru.
“Projek kedua iya nya jalai pansut ari Matang ke Sungai Maong ngena ungkus belanja RM140 juta ti dipelabaka berengkah dipejalaika pemadu laun bulan Januari taun baru lalu sebengkah agi projek iya nya ngaga jematan di Jalai Wawasan 2020 ke Rampangi ti benung dipejalaika.
“Ngarapka nengah tiga perojek tu, kitai ulih ngurangka penyekut jalai alun di Petra Jaya tu,” ku iya.
Kelimpah ari nya dalam jaku pengelalu pengerami nya Datuk Bandar DBKU Datuk Abang Wahap Abang Julai madahka pengerami nya diatur dikena nempa penegap begulai enggau pangan diri entara pengereja pengawa DBKU, senipak konsep 1DBKU.
“Pemanah kaul entara pengereja pengawa sebengkah ari penyulut organisasi dikena ngemujurka misi enggau visi.
“Nyadi sebengkah organisasi ti bisi pengereja pengawa ke ari mayuh macham bansa enggau jalai pengarap, kitai patut ngemeranka ulah beserakup enggau bekerejasama enggau pangan diri ngambika sama mai pemansang enggau penguntung ngagai menua sereta diri,” ku iya.
Dulu ari nya, mayuh macham aktiviti diatur baka enchabut tiket benasit, betanda, pemerindang ari Band DBKU sereta pekit Raja enggau Permaisuri Raya DBKU 2014.
Bisi datai ba pengerami nya kemari, bini Daud Datin Noraini Husin, Direktor DBKU Dr Saadiah Abdul Samat enggau Pegawai Kanan DBKU.