BINTANGOR: Opis Pengerara Api enggau Penyah Penusah (Bomba) nadai kala meri pemendar ngagai sapa-sapa penyual pala hos tong gas tauka kereban bukai ti bekaul niki rumah panjai.
Ketuai Opis Bomba Bintangor Ismuni Tepo madah, opis sida nangi komuniti rumah panjai pechaya ke jaku tukang penyual barang nya ke ngena nama bomba.
“Kami nadai kala meri pemendar ngagai orang bukai tauka penyual barang niki rumah panjai.
“Kitai nangi komuniti rumah panjai muntang pechaya ngagai orang ti beambi ulih ngena nama bomba,” ku iya.
Ismuni mantaika jaku nya ba rambau program Sivik Mesra beserimbai enggau Pengawa Nyuaka Setipikit Tuai Rumah ba sebengkah restauran di Bintangor ditu, empai lama ke udah.
Pengawa nya dipenyadi Sapit Residen Sarikei (Pengawa Rama) Lim Hock Meng lalu bela digulu Pemesai Pelilih Menua Meradong Masthapa Julaihi, Sekretari Opis Kunsil Meradong enggau Julau Adrian Luang, Pengulu Augutine Pau enggau bala ke bukai.
Ba pengawa nya, bisi 67 iku tuai rumah pelilih Meradong nerima setipikit nandu pengawa nyadi tuai rumah nyengkaum dua iku nerima setipikit baru nyadi tuai rumah.
Ku Ismuni, komuniti rumah panjai tau meli kereban dapur baka pala gas ti bisi ngundan chap SIRIM aja.
“Dikena nyeliah penusah angus, orang rumah panjai patut meli kereban ke bisi ngundan chap SIRIM.
“Nya alai, anang kaju meli kereban ari orang ke nadai pemendar lebih agi bala penyual barang ke bisi niki rumah panjai,” ku tandu iya.
Nambahka nya, ku iya, orang rumah panjai mega patut meresa tali gas sida dalam sebulan, tiga bulan tauka setaun sekali nangika bisi pantis.
Ismuni mega madah, penusah angus ke suah nyadi ba rumah panjai bepun ari pengilap diri empu.
“Bisi kes nyadi ketegal enda ingatka diri bisi nyumai di dapur sebedau bejegau ke bukai.
“Pun penusah tu ulih diseliah nyema diri empu semampai bejejaga belama,” pia ku iya.
Berindik ari pekara nya, iya ngelalau Komiti Pemansang enggau Pengelikun Genturung Pendiau (JKKK) rumah panjai numbuhka seiti raban pemansik pengelikun rumah panjai nyengkaum meresa pengelikun dapur ba timpuh ke patut.
Ba pekara bukai, iya mega ngenang raban bomba enda begaji ke empai ditumbuhka ketegal ari penanggul ngerejister raban nya.
“Kitai udah kelalu lama nganti raban bomba enda begaji tu bulih pemendar.
“Tang bala mayuh ba menua pesisir tau betemu enggau kami enda milih maya enti deka numbuhka raban tu lalu kami deka mantu enggau naka ulih baka nyali kereban ngerara api tauka meri ajar enggau licha.
“Nambahka nya, ambika banding, ba sesebengkah menua, sebuah rumah panjai tau begempung enggau empat tauka lima buah rumah panjai ke bukai numbuhka raban bomba enda begaji tu,” ku iya.
Kelimpah ari nya,Ismuni mega madah, ba pelilih Sarikei, udah bisi ‘Pemesai Bomba Bantuan’ iya ke diau dalam kandang lima kilometer penyauh ke ulih datai mantu dalam timpuh tiga minit aja nyema bisi nyadi penusah enda disadang.
Tang ba pelilih Bintangor ku iya, pekara nya nyangka deka bisi dalam kandang lima ngagai enam taun ke deka datai.