SIBU: Pekara pelajar ba nengeri Sarawak deka terus nyapai pemujur ke lebih penyulut nyema pemujur ke udah dijapai diatu ulih ditambah manah agi sereta ditanka belama.
Nitihka penerang Pemensai Opis Pelajar Pelilih Sibu Wong Chong Kung, maya taun 2013 pemutus Peresa Pengulih Sekula Primari (UPSR), Peresa Sekondari Baruh (PMR) enggau Setipikit Pelajar Malaysia (SPM) nengeri Sarawak bisi mandangka pemutus ke chukup manah.
“Ba taun 2013, pemutus UPSR, PMR, enggau SPM Sarawak endang iya ke pemadu manah dalam timpuh lebih ari 10 taun ke dulu suba,” ku iya rambau pengerami ‘To Sir With Love’ malam ensana ke diatur ba sebengkah hotel ditu dikena ngerami Direktor Opis Pelajar Negeri Sarawak (PPNS) Datu Abdillah Adam ke pinchin ari pengawa iya kena 17 Ogos tu.
Nangkan ke nya, Wong madah iya pechaya pemutus pekara pelajar Sarawak ulih bepekit enggau penggulih pekara pelajar ba menua semenanjung.
“Pada tahun ini saya amat yakin dan percaya keputusan peperiksaan awam kita akan terus melonjak dan akan terus meningkat.
“Seterusnya ia akan setanding dengan pencapaian di negeri-negeri lain di semenanjung Malaysia,” ujar beliau.
Nitihka penerang Wong mega, semua pemutus ke udah dipeda nya asil ari pengeransing Datu Abdillah sepemanjai iya ke mangku pengawa nyadi Direktor Opis Pelajar Nengeri Sarawak.
Nangkan ke nya, ba jaku iya Abdillah, madahka pemujur ke udah dijapai iya sekumbang ke udah gawa endang asil ari sukung semua pekereja ke gawa dalam opis pelajar di nengeri tu.
“Aku pechaya pemujur tu ukai semina ari opis pelajar aja, tang asil ari pemanah pengawa ke dikereja bala kita bai nya ba tikas opis pelilih tauka ba tikas sekula endur nentuka pemujur ke dijapai diatu,” ku iya.
Berebak enggau nya, iya mega meri besai puji ngagai semua bala pengajar ke gawa ba pelilih Sibu laban ke udah mandangka pemujur pengawa sebaka enggau nengeri-nengeri bukai di semenanjung.
“Aku meri besai puji ngagai pelilih menua Sibu laban pelilih menua Sibu aja di Sarawak tu mandangka pemadu manah pemutus peresa lalu sebaka enggau nengeri-nengeri bukai di semenanjung,” ku tandu iya.
Abdillah berengkah dipadu nyadi Direktor Opis Pelajar Nengeri Sarawak kena 1 March 2011 lalu iya sebedau nya kala mangku mayuh bengkah pengawa dalam opis pelajar. Iya mega udah bejalaika pengawa ngajar dalam pengelama 36 taun.
Rambau pengerami ke diatur malam ensana, kira lebih 1500 iku pekereja ke gawa ba Opis Pelajar ari pelilih Sibu, Selangau enggau Kanowit datai ngerami Abdillah ti deka pinchin.
Bela bisi datai malam nya, Pemesai Opis Pelajar Pelilih Kanowit Malsiah Jamal, Pemesai Opis Pelajar Pelilih Selangau Jambai Sayong, Sapit pemesai Opis Pelajar Pelilih Sibu Salemah Hj Chali, bala chairman gerempung, bala prinsipal enggau bala pengajar.