KUCHING: Buntas tasat tubuh dua iku nembiak kos berubat ari menua Britain ke dibunuh di Jalai Abell pagi Hari Tiga tu tadi, Neil Gareth Dalton, 22, enggau Aidan Brunger, 22, dipejalaika kemari.
Raban Media ke deka ngulihka berita senentang pengawa nya nyengkaum sekeda ari menua luar begempuru di luar pagar ‘mortuary’ Sepital Besai Sarawak (SGH) pengudah enda diasuh tama.
Urung pukul 10:15 pagi, dua buah teksi ke dipelaba kaling seduai ke parai dibunuh nya dipeda ngetu ba pintu pagar penama ‘mortuary’ sebedau sida seraban dikemendarka tama ke dalam nya.
Tujuh iku raban ke datai nyengkaum dua iku raban ari Newcastle University Medicine Malaysia (NUMed Malaysia) di Johor.
Raban Media ke nganti nyentuk ke pukul 12 tengahari ketegal ti deka ngerandau kaling sereta raban polis puntan pengudah enda dikeibuh sida.
“Sebarang penerang senentang kes tu semina ulih dikeluarka Komisyener Tinggi British di Kuala Lumpur,”ku Konsulat di Pebasa British (Kuching) Bernard long lebuh dikerandau The Borneo Post kemari.
Neil Dalton enggau Aidan Brunger datai di Kuching ba bulan Jun tu tadi lalu diadang nembuka timpuh latih di sepital kemari.
Seduai ditemu gegaring di tisi jalai pukul 4:15 pagi urung 80 m penyauh ari kafe endur seduai diserang empat iku lelaki ti ngena senyata tajam.
Diberita dulu agi ari nya sida bisi besangkal jaku ba sebuah kedai ngirup pengudah pansut ari sebuah palan pemerindang ke besemak.
Bedau lama pengudah penusah nya, seiku saspek ke beumur, 31, ditangkap di Jalai Green. Nangkanka nya dua iku agi saspek ke beumur, 23, enggau ,19, di tangkap di Genturung Pendiau Gersik enggau Genturung Pendiau Pulo.
Seiku agi saspek ke beumur 35 taun ari Genturung Pendiau Boyan ditangkap di Kenyalang Park urung jam 4:45 lemai Hari Tiga.
Semua empat saspek ditan riman lalu kes ditasat nengah Seksyen 302.
Neil Dalton enggau Aidan Brunger ari Newcastle University benung ngulu latih di SGH ngelama enam minggu begulai enggau lima iku nembiak bukai.
Sida lima diadang mulaika diri ke United Kingdom sehari tu (kemari).