Dikarang Jacqueline David //
ASAJAYA: Bekal ai di sitak Asajaya udah manah baka selama berindik ari hari ke bisi ujan kandang berapa hari tu ke udah.
Menteri Perengka Guna Mensia Mayuh Datuk Amar Awang Tengah Ali Hassan madah, kapasiti bekal ai ke diatu ungkup sitak nya 8MLD, tikas ai biasa ba pengulih pam 2.5m.
Iya madah, sekeda bengkah di Asajaya udah dibekal ai nengah Lembaga Air Kuching (KWB tauka LAK) datai di Pasar Asajaya enggau pemayuh ai, 8MLD.
Pemayuh orang ke ngena ai ke diatu di sitak nya dalam 7MLD ke datai ari Palan Pemeresi Ai Asajaya mungkur sekeda sitak Asajaya empu enggau Sadong Jaya, lalu enti dichampur enggau pemayuh ai nengah KWB ke magi 8MLD (15MLD semua), iya nyendiaka ai ke urung 7,200 meter ai ti disambung ungkup 38,000 iku mensia (sehari penyampau ai ke dikena bisi dalam 15MLD).
“Taja pia, laban kesuh ai enda deras, bisi sekeda genturung pendiau taja pan kediatu ai udah pulai manah baru, agi betapi enggau penyuntuk ai, ke agi begunaka ai dianjung ejensi Perintah ngagai genturung pendiau sida.
“Aku udah ngasuh KWB mantu nganjung ai ngagai genturug pendiau ke agi betapi enggau penyuntuk ai, ukai semina ngagai genturung pendiau ke udah datai jalai, tang nyengkaum ngagai ke enda datai jalai.
“Enti enda chukup tangki, sida iya tau ngasuh kompeni peribit mantu nganjung ai tang bekerejasama enggau Opis Residen, Kaban Kunsil Nengeri (ADUN) enggau Kaban Parlimen (MP) sereta komuniti di sitak tu. Sida iya patut netapka endur ke muntang alai orang mayuh ngambi ai,” ku iya.
Iya madah munyi nya lebuh bechairmanka aum media di Opis Palan Pemeresi Ai di Asajaya ditu , ensana.
Iya nandu, enti sema ngangkut tauka nganjung ai nya ngena kompeni peribit, enda tau enda disempulang pemesai ngambika ai ulih dibagi sama rata lalu lebih agi mungkur sitak ke endang amat-amat suntuk ai.
Baka ke udah dipadah iya sebedau tu, pengawa menih remang patut digaga seharitu (kemari) tang laban bisi penanggul mimit enggau bilun ke patut dikena menih remang nya bisi rusak, pengawa nya deka digaga dalam kandang dua, tiga hari tu ila.
Pengawa menih remang nya ila deka dipejalai ba sitak tauka pelilih menua ke balat betapi enggau kemarau baka di Simunjan tang enti ulih, ku iya, menih remang nya patut digaga di serata menua.
Taja pan, bekal ai di Asajaya udah manah baka selama, mensia mayuh dilalau bekelimat ngena ai, nimbun ai maya ulih, sereta dilalau nagang mensia mayuh nuba ikan tauka ngena rachun laban ari tuba nya tau ngamahka kualiti ai mata.
“Enti ai sungai kena tuba tauka rachun, kualiti ai nya enda manah lalu tau nganu pengerai kitai empu,” ku iya.
Sama bisi ngulu aum media nya kemari, Menteri Pemansang Infrastuktur enggau Penyambung Dato Sri Michael Manyin, Menteri Muda Perengka Guna Mensia Mayuh (Bekal Ai) Datuk Sylvester Entri, Menteri Muda di Opis Kepala Menteri (Pemansang Pengawa Dagang Orang Bumiputera) Datuk Naroden Majais, MP Kota Samarahan Rabiah Wang, ADUN Sadong Jaya Aidel Lariwoo, enggau Menijar Besai KWB Mohd Sabari Shakeran.