KANOWIT: Penyereta projek kerejasama nanam sabun begulai enggau Boustead Pelita Kanowit Plantation Sdn Bhd (BPKPSB) nangi bendar ke pengawa bechurika buah sabun ari kebun bedandang besai ditu.
Chairman Komiti Pemansang Boustead Pelita Kanowit Plantation Block B Penghulu Barnabas Angkis Luang madah, pekara nya nyadi berengkah dua taun ke udah.
Ku iya, empai lama ke udah sida bisi baum begulai enggau kompeni nya berandauka senentang pekara nyuaka dividen.
“Diatu kami nangi, pengawa bechurika buah sabun tu tau ngeruga penyampau dividen ke deka diberi ngagai kami ti bisi tanah ba kebun sabun dandang besai tu.
“Kami mega pechaya pekara tu nyadi nyangka bepun ari sida ke enda tepantup ati enggau dividen,” pia ku iya madah maya pengerami bejadika Komiti Rukun Tetangga (KRT) Sungai Bawan Zon 1 di Rumah Daniel Rangkong, Sungai Bawan ditu, hari Enam tu tadi.
Pengerami sehari nya dipenyadika Kaban Kunsil Nengeri (ADUN) sitaki Ngemah Alexander Vincent.
Bernabas madah, sida ke enda tepantup ati tu nyangka bepun ari penyampau dividen kelalu mit tauka laun nerima dividen.
Ku iya, ba projek kerejasama nya, 60 persin pulai ngagai kompeni, 30 persin penggi orang ke ngempu tanah lalu 10 persin diempu Opis Pengemata Pemansang Tanah (LCDA).
“Sida ti ngereja penyalah tu enda ngira bala bukai ke bela bisi nama ba projek kerejasama tu.
“Kami minta sida badu agi ngereja penyalah ti mai pengerugi ngagai mensia mayuh,” ku iya nandu.
Bernabas mega madah, taun nyin suba, sida nerima dividen RM750 ungkup sehektar tanah.
Projek kerejasama tu ku iya mungkur 6,000 hektar pemesai tanah ti diempu 1,700 iku pengempu tanah ke udah berengkah ari taun 1999 suba.