Dikarang Rengenyan Labang //
Nengah komiti nya Indu Opis SDNU enggau SDNU Siol Kandis ulih merambu pemansang ba tanah nya
MERESA: Mawan disempulang Philip enggau ke bukai beratika kandang endur ngelingi Balai Raya SDNU Pampang Siol Kandis ke diperambu deka dikemansang.
KUCHING: Presiden Gerempung Bansa Dayak Sarawak (SDNU) Tan Sri William Mawan bepenemu, sebengkah komiti bekaul enggau perambu ngemansangka lima ikar pemesai tanah SDNU di Siol Kandis patut ditumbuh.
Kebuah pia ku iya, ngambika nengah komiti nya piak Indu Opis SDNU enggau SDNU Siol Kandis ulih selubang ngiga penemu bekaul enggau perambu pemansang ti deka dikemajuka ba tanah nya.
“Nyadi asai sepi aku, manah numbuhka sebengkah komiti kena kitai berandauka utai ke disebut kitai tadi (kemari) iya nya pemansang baru ke diperambu deka dikemajuka ba tanah puang ditu.
“Ngarapka nengah komiti tu kitai ulih ngelubang penemu sereta nyuluk pemansang ngambika runding kitai enda muntang dikerichau orang ti deka nasalka penemu kitai enggaika semua utai ke diperambu, deka dipejalaika kitai enda mujur,” ku iya ti nyadi Menteri Pemansang Rama.
Mawan mansutka pekara nya ba penemuai ti keterubah seraya berandau enggau peranak Genturung Siol Kandis di Balai Raya SDNU Pampang Siol Kandis ditu, lemai kemari.
Bejaku baru iya madah, kelimpah ari ngetanka pesaka asal tauka tuai di Siol Kandis baka balai raya, gereja enggau pendam, tempat ke puang patut dikemansang ngambika tau meri asil sereta penguntung ngagai peranak menua ba genturung pendiau nya empu.
Perambu pemansang ti deka dipejalaika SDNU ba tanah pemesai lima ikar ba Genturung Pendiau Siol Kandis endang ngemeratka pemaik enggau pengelantang peranak endur nya.
Laban menua tu majak maju alai kitai patut tedani lalu nemu gaya utai ke mansang ba kitai, tuju polisi perintah enggau pemansang ke patut diatur ba tanah SDNU di Siol Kandis ditu, ku iya.
“Ba Siol Kandis tu kitai bisi raban bansa tauka komuniti ti besai ke udah lama sereta majak mayuh sereta bisi atur diri empu. Kitai bisi gerempung ti megai Dayak di Siol Kandis, balai raya, gereja enggau pendam,semua nya endang bisi sejarah.
“Kelimpah ari kitai ngetanka adat asal enggau pesaka lama nya, kitai mega patut ngatur diri ngena pemisi ke dikembuan kitai awakka meri penguntung ke peranak ditu empu lebih agi anak uchu kitai jemah ila, lalu asil ke dikereja kitai mega bisi dipeda sida jemah ila.
“Perambu pemansang ke deka dipejalaika ditu nya bisi meri asil belanja tauka penguntung ngagai peranak ba genturung pendiau tu,” ku iya.
Entara perambu pemansang ke deka dipejalaika ba tanah lima ikar ke diempu SDNU di Siol Kandis baka rumah betingkat ke ulih disuwa, endur belatih, balai mayuh guna, urung 300 palan pengengkah kereta enggau ke bukai.
Nyempulang Mawan kemari, Mandal Presiden Anthony Banyan enggau ke bukai sereta sama bisi dia Penghulu Petra Jaya Philip Entawan enggau ke bukai.
Berebak enggau tu Mawan meri RM30,000 ungkup taun 2014 ngagai Kelab SDNU dikena bejalaika mayuh macham program enggau pekara ke patut.