Dikarang Judan Bungap //
Suba semaya projek ulih tembu dalam kandang enam bulan
SELANGAU: ‘Baka ke nganti buah enda labuh’, diatu peranak Rumah Rantai Aluk ba Ulu Balingian, Tepus ditu mengkang nganti projek jalai ngelawa rumah panjai sida nya tem-bu.
Maya berandau enggau pengarang berita kemari, Tuai Rumah Rantai madah, projek jalai 1.5 kilo-meter ke beungkus lebih RM2 juta nya berengkah digaga taun 2010 suba tang nadai temu kebuah dua taun udah nya konteriktor ti udah dipadu nembuka projek nyau lesap.
“Kami serumah gagit ninga berita madahka rumah panjai kami diberi jalai alun diumba enggau semaya jalai nya tembu dalam kandang enam bulan aja.
“Anang ke enam bulan diatu nyau manggai taun 2014, jalai ke dianti tu mengkang nadai kelai deka tembu,” pia ku iya madah.
Rantai mega madahka diri kala betemu enggau pengari rayat menua sida tang sida bela enda nemu pejalai projek nya nyentuk ke diatu.
Nambahka nya, Rantai madah, iya kala ngelawa Opis Parit enggau Entali Ai (DID) Sibu tang iya dipin-ta ngelawa indu opis nya di Kuching.
“Kami enda kala ninga rita projek tu agi baikka ari konteriktor tauka opis ti bekaul.
“Kami enda nemu sapa ke patut dilawa kelimpah berasai alit ati laban ungkus dikena nembuka projek tu bangat mayuh tang enda nemu tembu-tembu,” ku iya ti megai 15 pintu bilik ke diuan kira bisi 105 iku peranak.
Naka ke diatu sida semenua ku iya, semina bepanggai ba jalai kompeni batang enti deka mindah ke bukai.
Iya madah, jalai nya enda ulih ditengah lebuh hari bisi ujan bangat laban ke endang luchak kelimpah tau bendar ngeruga pengelikun.
“Nya alai, bisi anak kami ditu ke besekula ba SK Pelugau, kira lima kilometer penyauh enggau SMK Ulu Balingian, enda ulih nurun ke sekula nyema ujan bangat pagi hari.
“Nambahka nya, jalai tu mega enda likun ditengah maya malam hari,” pia ku iya madahka sebana sida ba menua nya.
Rantai mega madahka sida serumah enda nyalahka perintah tauka pengari rayat menua sida tang deka nemu nama kebuah ungkus RM2 juta nya enda ulih tetembuka jalai sida ke semina ngembu-an penyauh 1.5 kilometer aja.
Iya ngarap opis ti bekaul ulih madah enggau silik ngagai sida serumah pejalai projek nya diatu baikka enda chukup ungkus tauka puku tauka ketegal ditekul pekara bukai.